Utset moglegheitsstudie
I februar bad heradsstyret om ein moglegheitsstudie av bruk av Ungdomshallen. Utgreiinga må venta.
Rådmann Anita Hesthamar orienterte om det i formannskapsmøtet torsdag 7. mars. Grunngjevinga er at det allereie er mykje på gang som vil påverka arbeidet. Det vert mellom anna jobba med eit framlegg til eigedomsstrategi for heradet. Denne bør vera komen lenger før arbeidet med studien tek til, meiner rådmannen.
I grunnlaget for strategien inngår mellom anna tilstandsvurdering av bygg, inkludert Ungdomshallen. Elles vert det arbeidd med verdibevarande vedlikehald, vedlikehaldsetterslep og kartlegging av behov, og med kva dei overordna måla for eigedomsforvaltinga skal vera, sa Hesthamar.
– Eg meiner det ikkje er rett å setja i gang mykje folk med dette før me veit meir, sa ordførar Torgeir Næss (Ap).
Geir Madsen (SV), som står bak framlegget om moglegheitsstudien som vart vedteken i februar, er samd, men håpar at arbeidet ikkje vert utsett lenge. Han ynskjer ei tilbakemelding til hausten for å ha saka med i budsjettprosessen.
Moglegheitsstudien skal ta føre seg Ungdomshallen og naboareal, og rådmannen er beden om å involvera aktuelle lag og organisasjonar, brukarar, ungdomsrådet og grendeutvalet i arbeidet. Moglege kommunale funksjonar i bygget skal vera del av studien, og saka skal leggjast fram for heradsstyret i september, seier vedtaket.
– Kor mykje utsetjinga vil ha å seia for framdrifta, er førebels usikkert, sa Hesthamar til formannskapet.
