– Utfordrande vegstandard
I samband med planlagde utbetringar på fylkesveg 79 ved Fyksesundbrua bør høvet nyttast og Klyvevegen betrast.
Bønder, grendelag og næringsdrivande på Fykse meiner i alle fall det. Det kjem fram i eit framlegg sendt til byggjeleiar Einar Selland i Vestland fylkeskommune.
Med små tiltak kunne vegen vorte klassa opp til større akseltrykk og køyretøylengde, og gjort det meir tenleg på alle vis for større køyretøy, skriv fyksingane. Også Jan Tjosås, leiar for næring i Kvam herad, har skrive under på framlegget.
Fykse er ei aktiv grend og det er eit auka behov for transport, både knytt til turisttrafikk, frakt av landbruksvarer og annan tungtransport, står det. Opptil 100 bussar vitjar Gamlastovo Gardsrestaurant i sommarsesongen, varer skal til og frå Fykse Gartneri AS, dyr skal til slakting og frukt skal hentast, for å nemna noko.
Dagens standard på Klyvevegen gjer dette utfordrande. Særskilt for køyretøy som er over 12,5 meter, byr vegen på store utfordringar med omsyn til svingradius og breidde, står det i framlegget.
Tre utbetringar vert føreslegne. Ein av dei er å utvida vegen like før og etter «veslebrua» ved avkøyrselen frå fylkesveg 79, for å letta inn- og utkøyring på brua. Også på strekkja like etter bør vegen utvidast, ifylgje framlegget.
Det sistnemnde tiltaket er eit stort inngrep, men bør likevel vurderast som naudsynt på grunn av arbeid på hovudvegen under. At Klyvevegen skal verta «hengjande» på ròte fjell over fylkesvegen, kan ikkje vera forsvarleg eller ynskt, skriv Arne Fykse på vegner av grenda.
Også mindre tiltak i krysset mellom Klyvevegen og Bjørkevegen bør vurderast for å betra snutilhøva for større køyretøy, står det i framlegget.
