Utan skjenkjeløyve i ni dagar
Tyst slapp å mista skjenkjeløyvet før jule- og nyttårsfestane var over.
Etter å ha vorte tildelt seks nye prikkar etter fleire brot på alkohollova, og såleis fått 14 totalt, mista skjenkjestaden i Øystese gjennom driftsselskapet Holmatun AS skjenkjeløyvet i ni dagar frå og med 3. januar.
Dimed kunne mellom anna heimekomefesten, fjerdedagsfesten og nyttårsfesten gå sin gang med alkoholservering før straffeperioden.
Bør er i praksis skal
Skjenkjestaden hadde ikkje merknader til regelbrota eller varselet om inndraging. Sistnemnde hadde uttalefrist 19. desember, og vedtaket om inndraging vart gjort få dagar seinare. Tyst fremja ynske om inndraging frå og med 3. januar, og fekk gjennomslag for det i Kvam herad.
Les også:
Ifylgje alkoholforskrifta bør inndraginga skje innan fire veker etter at vedtaket er gjort. Forvaltingspraksisen er at det vil seia eksakt fire veker etter vedtaket, men at dersom den råka verksemda ber om inndraging tidlegare, vert det ynsket nær sagt alltid oppfylt. Det opplyser leiar for skjenkjekontrollen, Nils Anders Bolstad.
Han stadfestar at denne praksisen inneber at ein aktør som i utgangspunktet ligg an til å få skjenkjeløyvet inndrege i til dømes ei inntektsbringande høgtid som jul eller påske, i praksis kan sleppa det ved å be om tidlegare inndraging.
Heradet har ikkje andre motiv i slike saker enn å retta seg etter forskrifta, påpeikar han.
For større aktørar
Ifylgje Bolstad er den generelle tidsramma på fire veker fastsett fyrst og fremst med tanke på større aktørar. Dei kan trenga tid til å omstilla seg til eit mellombels liv utan skjenkjeløyve, med tanke på til dømes innkjøp og permitteringsvarsel.
Utanom dette høvet til å be om raskare inndraging har ikkje skjenkjestadene høve til å påverka tidspunktet, bortsett frå at dei kan velja å senda eller ikkje senda merknader i saksgangen som eventuelt kan endra det kommunale synet på saka.
Bolstad fortel at han er kjend med tilfelle der løyvehavarar medvite har pådrege seg prikkar på slutten av «skjenkjesesongen» for å få straffa overstått og sleppa å dra prikkane med seg inn i ein ny sesong.
