Ut på tur – alltid sur for vegstandarden

I tur og orden fekk ordførarane i regionen – minus han i Kvinnherad som rota med datoen og aldri dukka opp – ordet for å marknadsføra kvar sine dårlege vegar andsynes makthavarane i fylkestinget 23. april.

Torgeir Næss (Ap) i Kvam, Terje Søviknes (Frp) i Bjørnafjorden og Roald Aga Haug (Ap) i Ullensvang skreik si vegnaud for dei omreisande lemene i hovudutval for samferdsle og mobilitet (SAMO).

Fyrst ut som gaid på smale vegar var Næss, som nytta taletida til å ta opp det fylkespolitikarane kunne sjå med eigne augo frå bussen: tunnelen til Eikedalen og konsekvensane av tunnelinnslaget i kvar ende. Kvemmingen vart avløyst av Terje Søviknes i Samnanger. Og sidan gjekk det nær sagt slag i slag i slag med vegklagesongar medan bussen snirkla seg fram på vestlandsvegane.

– Ikkje så skvetne

Under lunsjpausen i Olaløo i Sunndal vart særleg vegar som er viktige for Jondal, framheva. Styreleiar Kristian Bondhus-Jensen i Ænes og Mauranger Bygdalag tok opp den skredutsette vegen mellom Nordrepollen og Austrepollen, der det frykta Bergsfjellet kneisar over fylkesveg 49.

Han, som sjølv pendlar frå Sunndal til Odda, slo fast at dei som bur i området, ikkje er så skvetne av seg, men heller vane med at det ramlar stein ned på vegane. Men om folk kvir seg for noko, er det for å køyra mellom pollane, der skredfrekvensen – med små og store skred – er høg.

– Alt som kjem ned, endar anten på vegen eller i fjorden, sa han.

Han viste til at det i 1949 gjekk eit gigantisk skred i området, der 150.000 kubikkmeter fjell skal ha rasa rett i fjorden. Grensa for det som vert kalla fjellskred, går ved 100.000 kubikkmeter.

– Ein kan kanskje ikkje kalla det skrytebilete, sa Bondhus-Jensen då han viste fotografi av steinar som har falle ned på vegen.

Den siste tida har fylkeskommunen byrja stengja vegen i dårleg vêr på grunn av risikoen for skred.

Fleire tunneltrasear mellom pollane er vurderte. Innslaget ved Nordrepollen er spikra, medan det finst fleire ved Austrepollen. Bondhus-Jensen oppmoda fylkespolitikarane om å velja den lengste av dei, men sa at innbyggjarane i området ottast at det kortaste – med veg i dagen gjennom bygda – kan verta utfallet.

– Når ein gjer dette, får ein gjera det på ein måte som er ålreit, sa han.

– Forventar trykk

Også Sigrid Brattabø Handegard, som fekk ordet på vegner av Jondal Bygdalag, fekk ordet i Olaløo. I tillegg til å peika på trongen for gang- og sykkelveg mellom Sætveithagen og Jondal sentrum framheva også ho ynsket om tunnel mellom pollane.

– Dette er pendlarveg og skuleveg, og det er ein stor auke i tungtransporten etter at Jondalstunnelen kom, sa ho.

Ho understreka at jondølingane forventar fullt trykk i arbeidet med reguleringsplanen for strekninga. Planprogrammet vart nyleg godkjent av Kvinnherad kommune, som er planstyresmakt sidan strekninga ligg der.

Ho håpar på eit spleiselag med staten på laget for å finansiera tunnelen, gjerne som del av «armen» til Bergen.

Handegard påpeika òg at den dels smale vegen mellom Jondalstunnelen og Jondal bør verta tilgodesett med planlegging og tunnelmassar.

– Kan nesten le

Roald Aga Haug påpeika at Mauranger er eit knutepunkt mellom Kvinnherad, Kvam og Ullensvang, som kan få ein sterk, sams bu- og arbeidsmarknad. Norheimsund, Husnes og Odda kan verta eit gylle triangel, men det føreset korte avstandar og gode nok vegar, påpeika han.

– Infrastrukturen er så elendig at du kan nesten byrja le når du er enkelte plassar, både på riks- og fylkesvegane. Du kan reisa frå Brattlandsdalen til Hardangerbrua, og det er nesten ei oppleving i dårleg veg. Og du kan få ei oppleving mellom pollane som ikkje er hyggjeleg, sa Haug.

Dei hyppige skreda og ikkje minst den preventive vegstenginga sperrar tidvis Odda heilt inne, med dei utfordringar det fører med seg.

Han understreka at kommunen ikkje eigentleg ynskjer å profilera seg med dårlege vegar, og at det for det meste er ypparleg å bu i Hardanger. Den store aktiviteten i Ullensvang kjem trass i vegstandarden, sa han.

– Eg har ikkje sett nokon som har det verre enn oss, sa han.

– Resten ikkje så bra

Søviknes, som tok opp mellom anna vegstandarden frå både Eikelandsosen og Hisdal til Osøyro, ottast at fylkespolitikarane fekk eit feilaktig godt inntrykk av vegstandarden i Bjørnafjorden. Hans tid ved bussmikrofonen var nemleg på strekninga frå Tysse til Eikelandsosen, som han er nokså nøgd med.

– Kvaliteten på resten av fylkesvegnettet er ikkje fullt så bra som det de har køyrt på no. No har de fått sjå noko av det beste. Så ynskjer me at resten skal opp på same standard. Nei, me ynskjer ikkje det eingong – me ynskjer berre litt punktutbetring, sa Søviknes før han hoppa av bussen.

Apropos punktutbetring. Torgeir Næss opna turen med noko ein samferdslepolitikar sjeldan opplever: skryt. Han rosa nemleg pengane som er løyvde til punktutbetring og har auka standarden på vegen mellom Granvin og Ålvik.

– Det er enorm skilnad på å køyra frå sentrale Kvam til Voss i dag i forhold til for 10–15 år sidan, sa Næss.

Bussjåfør for dagen, Kjell Ove Opheim frå Kvam, fekk æra av å avrunda rundreisa på den smale sti. Eva Sundal, overingeniør i seksjon for vegforvalting i avdelinga for infrastruktur og veg i fylkeskommunen, spurde han kva han som bussjåfør synest om vegstandarden. Han helte litt kaldt vatn i blodet på dei ivrigaste vegsutrarane.

– Det er greitt. Verst er det om somrane, når turistane kjem. Det kjem litt stein og litt is ned av og til, men det er slikt me må leva med.