Ut på jubileumstur

– Lenestolen braut saman, og så las eg i avisa at dei skulle starta Karatrakk. Så då vart eg med.Eide har fått ny lenestol, men har likevel stilt opp på kvar einaste tur sidan. Onsdag var han sjølv turleiar då dei trakkande karane sette kursen i haustleg opphaldsvêr frå Hovland mot Blomsete. Etter kvart kom det sludd, så karane kom berre halvvegs til Skårsete.Turen onsdag var ein aldri så liten jubileumstrim. Han var nemleg nummer 100 i rekkja.

Yngst og tyngst

Den eldste i Karatrakk, som var med seinast i vår, er 96 år gamal. Offisielt er gruppa for dei over 55, men Eide fekk snike seg med likevel. Han fortel at han er både yngst og tyngst i gjengen.– Då eg byrja i Karatrakk, røykte eg òg, men eg kasta røyken etter nokre månader. Sidan har eg vore røykfri. Eg har faktisk gått litt opp i vekt, men det er no litt til og frå på fleire av oss. No har eg vorte oppelda til å gå på treningssenter òg, så eg får to treningsøkter i veka.– Og du har avansert frå turgåar til turleiar?– Ja, eg vart spurd om å leia turar i Øystese sidan eg var den einaste derfrå. Turleiarane møtest og fordeler turane på ei liste for kvart halvår. Me har to til fire turar kvar i halvåret, og turleiaren bestemmer turmåla.– Korleis tenkjer du når du vel turmål?– Eg vil helst ha nye stader kvar gong. Eg burde vel ha gått opp løypa på førehand, men eg likar ikkje å gå same turen to gonger. Me har gode kart, men om det er trong for det, får eg litt hjelp av andre.

Flytta til Kvam

Eide er oppvaksen på Voss, men mora kjem frå Kvam. Då faren døydde, selde familien eigedomar på Voss. Mora ville til Kvam, og Eide fann ut at han òg like godt kunne flytta sidan det meste av slekta bur der.Eide seier karane har gått tur kvar einaste gong det har vore planlagt, sjølv om regn og ruskevêr stundom har herja.– Me har endra tre turar på grunn av kraftig regn. Då finn me ein ny tur vekke frå elvar og bekker, seier Eide.– Kva spesielle minne har du frå alle turane?– Kjepso er ein spesiell plass, og Fitjadalen er kjekk, men eg hugsar vel så godt dei tyngste turane, som ein tur til Olsheller og ein tur i snø til Blomsete i Steinsdalen. Dei fekk lura meg med at det «er berre litt til og så litt til og så litt til».

God kjende karar

Deltakinga er gratis. Karane møtest ved Spar i Norheimsund, samordnar køyringa og legg i veg. Sjåførane får 20 kroner av kvar av passasjerane, det doble om det er bompengar i vente.– Kva får du ut av turane?– Trening og det sosiale. Me vert betre og betre kjende. Bortsett frå i jula, påsken og sommaren går me året rundt. Det siste året har det vore mykje dei same som er med. Me er stort sett ikkje fleire enn ti. På to turar har me vore berre to med, seier Eide.Bak initiativet står Grannehjelpa. Frivilligsentralen i Kvam står dessutan bak to andre turtilbod midt i veka. Kvar tysdag er det fottur med Fotalaget, og kvar onsdag er det eit lågterskelturtilbod av Trakkatrimmen. I tillegg har pensjonistlaga eigne turopplegg.