Ustabilt vêr i vente over heile landet

Seinsommaren byr ofte på skiftande vêr, med ei blanding av byer og sol. Dei neste dagane vil vere prega av slikt skiftande vêr over heile landet.

– Det er vanskeleg å trekkje dei store linjene framover no når vêret skiftar såpass fort. Det er kanskje litt typisk vêr for overgangsmånaden august, seier statsmeteorolog Eldbjørg Moxnes ved Meteorologisk institutt til NTB.

Austlandet har dei siste dagane vore prega av styrtregn og torevêr. Tysdag pøste det periodevis ned, noko som mellom anna førte til at Oslo-trikkane vart ståande i morgonrushet på grunn av dei store vassmengdene.

På målestasjonen i Hakadal vart det sett nye rekord med 70,6 millimeter på eitt døgn, noko som svarer til sju tilitersbøtter med vatn per kvadratmeter. Mest nedbør på eitt døgn vart registrert i Drangedal i Telemark med 86,9 millimeter.

– Det vart relativt vått mange stader, og mange hadde nok den første toreopplevinga si i sommar, seier Moxnes.

Kan bli ein del regn fredag

Styrtregnet ser likevel ut til å vere over for denne gongen, og det er venta ein rolegare vêrtype på Austlandet.

Fredag vil likevel kunne by på kraftig nedbør enkelte stader, men det er ikkje lett å anslå kvar det vil treffe, forklarer Moxnes.

– Førebels ser det ut til å gå inn i Hedmark og Østfold-traktene, men det kan også forsvinne inn i Sverige. Det blir nok antakeleg ein del tore og styrtregn dersom det kjem inn i våre område, seier Moxnes.

Laurdag vil det truleg bli opphaldsvêr på Austlandet med temperaturar rundt 20 grader, medan det kan bli ei og anna spreidd bye på søndag. Vêrutsiktene er nokså like på Sørlandet, men der kan det truleg komme litt meir nedbør enn på Austlandet.

Sol og tore

Etter fleire fine dagar på rad i vest vil det kunne bli ein del nedbør på Vestlandet frå fredag.

– Det blir nok litt grått og periodar med regn gjennom helga. Det kan bli gløtt av sol på laurdag. Men elles vil det nok ikkje bli noko varme frå sola, så temperaturane vil til dømes i Bergen liggje på rundt 12–13 grader søndag.

I Midt-Noreg vil fredagen kunne by på litt morgontåke, med enkelte regnbyer utover kvelden. Det vil bli relativt varmt, rundt 25 grader dei varmaste stadene, og det vil derfor kunne komme torevêr.

– Så søkk temperaturane nesten 10 grader inn mot laurdagen, og det går mot veldig skiftande vêrtype, seier Moxnes.

Varmt i nord

Det har vore varmt i Nord-Noreg dei siste dagane, og sjølv om temperaturane vil falle litt dei neste dagane, blir det varmare igjen inn mot helga.

– Fredagen kan det fort bli 25 grader enkelte stader i Troms og Finnmark, og kanskje også ned mot Nordland, seier meteorologen.

Temperaturane vil halde seg greie gjennom helga, men det blir nok ikkje knallvêr sjølv om det er varmt. Regnbyene i sør vil truleg trekkje nordover, og helga vil bli prega av ein del spreidde byer fleire stader i nord. Frå måndag vil det bli kjøligare i Nord-Noreg

(©NPK)