Usamde om tak som lek

28. august varsla Eva Cecilie Holm i Nedre Valland-Nes Grendalag om at taket på båtverkstaden i Holmsund ikkje er tett. Ifylgje Stein Rykkje, leiar for forvalting, drift og vedlikehald (FDV) av bygg i Kvam herad, er det staten som eig huset, men heradet som har ansvar for vedlikehaldet.

Dagen etter varselet sende Rykkje ein e-post til Byggmester Haakon Kvestad AS. Rykkje skriv at vasslekkasjen må utbetrast som ein reklamasjon snarast for å unngå store følgjeskadar.

I svaret frå Haakon Kvestad skriv han at han har oppfatta at taket har vore tett. Han ynskte eit bilete frå utsida, for å sjå om ei skiferhelle har snudd seg eller knokke. Holm fotograferte og sende bilete allereie same kveld. Så vart det stille.

9. september sende Holm purring til Rykkje, som dagen etter sende ny e-post til Kvestad. To dagar etter sende Rykkje brev til Kvestad. Der skreiv han at dette hastar på grunn av fare for større fylgjeskadar, og bad om snarleg utbetring og tilbakemelding med framdriftsplan.

– Det er mindre enn fem år sidan taket vart sett opp, så dette er ei garantisak. Eg vil helst ikkje ta i saka. Me hjelper entreprenørane for mykje, og endar ofte opp med å ta for mange slike saker sjølve. Me ynskjer at Kvestad skal ta ansvar og fiksa taket slik at det blir tett, seier Rykkje.

Var på inspeksjon

Nyleg var Byggmester Haakon Kvestad på plass i Kvam for å kontrollera taket. Det var berre eitt problem: Det regna ikkje på Valland den dagen, opplyser Kvestad.

– Me var på plass med mannskap og utstyr for å fiksa taket, men me fann ingen feil.

På bakgrunn av det tok Kvestad kontakt med Rykkje, og bad om å få nye bilete neste gong det regnar.

– Kvestad kasta ballen over til oss. Eg skal ta ein runde for å sjå korleis det ser ut, og sjekka det han bad om. Det er tydeleg at Kvestad ikkje ynskjer å bruka tid på å finna problemet, seier Rykkje.

Bileta Holm tok i august, viser vatn på golvet inne. Kvestad fortel at han ikkje har høyrt noko om at taket lek før no. Byggmeisteren vart skuffa over at ingen prøver å samla opp vatnet. Det meiner han er huseigar sitt ansvar. Han seier at dersom ein ikkje med enkle grep kan tetta taket der det lek, må ein setja inn noko for å samla opp vatnet. Ingen vil ha vatn liggjande på eit tregolv, seier han.

– Huseigar har plikt til å avgrensa skadar, om ein ser noko gale, seier han.

– Alt er intakt

Rykkje var ikkje på plass for å sjekka lekkasjen sjølv, og har berre sendt bileta frå Holm vidare til Kvestad.

– Me fekk kjeft av Kvestad fordi me ikkje hadde sett opp noko for å samla vatnet. Eg var ikkje der, og skaden var allereie skjedd, seier Rykkje.

Kvestad tek ansvar for legging av taket, men ikkje for steinane som er lagde. Det var heradet som hadde ansvaret for skiferhellene, sidan dei var brukte på bygget tidlegare, meiner Kvestad.

– Om me hadde gjort feil eller gjort ein dårleg jobb, ville taket leke frå dag éin. Me har sjekka, og her er alt intakt, seier Kvestad.

Det hadde vore enkelt å finna årsaka om det var eit betongpannetak, for då gjeld det ofte ein stein og ein ser problemet, seier Kvestad. Han forklarer at stein kan endra seg. Heller kan få skjulte sprekkar, fordi dei til dømes har fått eit kakk tidlegare. Dette kan utvikla seg over mange år. Etter nok vêr, vind og frost kan hellene sprekka og verta øydelagde. Hellene kan òg verta øydelagde om noko kjem fykande i vinden og treffer dei.

– Stein er stein. Det er eit naturmateriale som kan liggja i fleire hundre år, om steinen ligg som han skal. Om steinen er problemet, er det utanfor vår kontroll, seier Kvestad.

– Vil aldri verta heilt tett

Det kan henda at skiferhellene på taket vrir seg. Kvestad ser for seg to aktuelle forklaringar på at vatnet kjem inn. Anten har det blåse så mykje at det har kome noko, til dømes stein eller lauv, mellom hellene. Eller så har det byrja veksa noko mellom hellene som gjer at dei flyttar på seg, trur han.

Vêret kan ha medverka til at vatnet kjem inn. Kvestad fortel at det ikkje er undertak på bygget. Det kan koma vatn gjennom hellene om det blæs og regnar mykje. Det skal ikkje renna inn, og det skal tørka opp mellom kvar gong, seier han.

– Taket er laga etter gamaldags tradisjon. Med vêr og vind vil det aldri verta heilt tett, men det skal ikkje koma inn vatn ved vanleg regn. Viss eg skal ta ansvar for vêr og vind i Kvam, må eg byta yrke, seier Kvestad.

Rykkje seier at ein må rekna med at nokre dropar kan koma inn, men han meiner dette var ein større lekkasje. Likevel trur han ikkje at skadane er store. Det er kanskje nokre bord som må rettast opp fordi dei har krølla seg, men noka misfarging vil det uansett koma i eit naust med helletak, seier han.

Kvestad reagerer på måten heradet har lagt fram saka på.

– Det vert lagt fram som at me har lurt nokon, men eg er oppteken av å retta opp i alle feil me har gjort. Eg er i utgangspunktet like interessert som han i å finna årsaka til at vatnet kjem inn, seier byggmeisteren.

Kvestad har bede om at det vert teke nye bilete med merkelappar både ute og inne, slik at det er mogleg å avklara kva som har skjedd og kven som har ansvaret.