Usamde om sluttoppgjer
Kvam herad og Fuglafjell AS er ikkje samde om sluttoppgjeret etter bygginga av Strandebarm omsorg. No har usemja vorte advokatmat.
I eit møte i byrjinga av mai kom det fram at Fuglafjell og Kvam herad i stor grad er einige om sluttoppgjeret for prosjektet. Berre eitt punkt er framleis omtvista: lønns- og prisjusteringar som fylgje av seinkingar i prosjektet.
Fuglafjell krev full kompensasjon for justeringane. Kravet er på vel 2,3 millionar kroner utan moms.
Fekk to alternativ
Eit skriv frå Fuglafjell til Kvam herad 21. mai skildrar bakgrunnen for usemja. Dagleg leiar Håkon Hjartnes skriv at forskyvinga kom då Kvam herad utsette byggjeprosjektet på grunn av ein klage til Klagenemnda for offentlege anskaffingar (KOFA). Ei anna verksemd meinte at Fuglafjell ikkje stetta kvalifikasjonskrava. Det gjorde at heradet utsette bygginga til handsaminga av klagen var ferdig.
Ifylgje skrivet skal Fuglafjell ha vorte spurt om selskapet framleis ville stå ved tilbodet. Svaret frå Fuglafjell AS var positivt, med merknad om at kontraktssummen måtte reviderast som fylgje av utsetjinga, skriv Hjartnes. Ifylgje han kommenterte Fuglafjell i kontraktsmøtet etter klagehandsaminga at verksemda med stort sannsyn ville nytta retten til å be om endring i prosjektet.
Kvam herad meinte at det ikkje var heimel for dette i avtalen. Heradet la fram to moglegheiter: signera avtalen med tilboden kontraktssum eller trekkja tilbodet.
Avviser krav
Kontrakten vart signert.
– Ein såg det ikkje som ei reell moglegheit å prøva Kvam herad sine påstandar juridisk før kontraktsinngåing, skriv Hjartnes til heradet.
Etter kontraktsinngåing vart det, som verksemda hadde varsla, sendt inn krav om tillegg. Heradet avviste kravet, men Fuglafjell har sagt tydeleg at kravet står ved lag, ifylgje Hjartnes. Han skriv at dersom Fuglafjell skal dekkja meirkostnaden, betyr det at byggherren og den avviste tilbydaren kan påverka vald entreprenør si drift og konkurransekraft. Ein annan konsekvens kan vera at klagande entreprenør kan pressa den valde entreprenøren til å seia frå seg prosjektet, skriv den daglege leiaren.
Byggjeleiar Gisle Gravdal har svara verksemda på vegner av Kvam herad. I svaret skriv han at heradet har drøfta kravet og avvist det med same grunngjeving som tidlegare: «Me ynskjer å klarleggja at det ikkje er heimel i avtalen for «ei endringsanmodning som fylgje av tidsforskyvinga», og Kvam herad vil heller ikkje akseptera ei slik endring».
– Ikkje grunnlag
I slutten av juni fekk Kvam herad tilsendt eit brev frå advokatfirmaet Økland & Co Da. Dokumentet er unnateke offentleg innsyn. HF har bede om innsyn, men fekk avslag. Ein klage på avslaget er send til avgjerd hjå Statsforvaltaren.
Eit svar vart sendt til advokatfirmaet i juli. I svaret skriv Lars Ese Ur, teknisk sjef i Kvam herad, at heradet vil koma tilbake med eit svar etter ferien. Ur nemner også at heradet meiner at atterhaldet var avklara før kontrakten vart signert. Vidare meiner heradet at det ikkje er grunnlag for å justera vederlaget.
Om det likevel skulle vera grunnlag for ei justering, meiner heradet at kravet ikkje kan gjelda for ein så lang periode og at det påståtte kravet er rekna ut på feil måte.
I ein e-post 23. august skreiv Ur til HF at Kvam herad ikkje hadde sendt nytt svar enno.
– Sidan dette er ein pågåande diskusjon og eventuelt forhandling, ynskjer eg ikkje å kommentera kravet no, skriv Ur.
Heller ikkje Håkon Hjartnes i Fuglafjell ynskjer å kommentera saka.
