Usamde om rundballar i sjøen

I ein e-post til Kvam herad hevdar han at kring seksti siloballar fór på sjøen. Byrkjeland seier at siloballane lenge låg og flaut i sjøen, og at fleire vart liggjande lenge på stranda. Han meiner at straumen har ført ballane med seg langt av garde, og at plasten no ligg i sjøen ved Blyberg og har blitt dregen med innover mot Norheimsund.

– Rydda heile hausten

Siri Byrkjeland fortel at bølgjene frå elva drog med seg både siloballar, tunge jernbjelkar og store steinar. Ifølgje henne var bølgjene så kraftige at ballane vart slengde opp i tre, slik at det gjekk hol på plasten. Ho fortel at ballane fekk hard medfart på turen nedover elva, slik at dei gjekk i oppløysing.

I dagane etter flaumen starta oppryddinga. Ho fortel at ein fridykkar var ute i sjøen, på oppdrag frå henne. Dykkaren melde tilbake at han ikkje kunne sjå noko i sjøen.

– Eg gjorde det eg kunne for å rydda opp. Det var ikkje mykje som kunne reddast, men det vart rydda heile hausten. Eg fekk hjelp av elevar frå Framnes Kristne Vidaregåande Skule, seier ho.

Jan Tjosås, leiar for næring og landbruk i Kvam herad, fortel at heradet hjelpte til med å hyra elevar frå skulen til å plukka plast som var synleg i fjøra.

Ottar Byrkjeland seier at ordførar Torgeir Næss har vore på synfaring i Vikøy to gonger. I ei tilbakemelding til Byrkjeland skriv Næss at han melde punktet inn til den førre plastryddeaksjonen i regi Rein Hardangerfjord. Næss lovar at han vil melda det inn igjen til aksjonen i september. Tjosås seier at dykkarar vil vera tilgjengelege under årets aksjon, og at dei då vil ta ein ekstra sjekk i området.

Tinga ubåt

I 2022 var ein ROV, ein fjernstyrt undervassfarkost, på plass for å undersøka området. Det er dokumentert i ein rapport frå Uvs Vest AS som Kvam herad journalførte fyrst etter at HF etterlyste dokumentasjon i ureiningssaka. Anna finst ikkje.

Den kortfatta rapporten med vedlagde bilete og film kosta heradet om lag 15.000 kroner. Ifølgje dokumentet vart det fjerna siloballplast og anna avfall frå havbotnen. Tjosås fortel at det vart søkt i sjøen ved munningen av elva.

– Eg trudde me var ferdige med saka etter det. Det har ikkje vore nokon som har teke kontakt på grunn av plast i samband med badeplassen som ligg like ved. Eg meiner heradet har strekt seg langt for å rydda opp, seier Tjosås.

Ottar Byrkjeland meiner heradet har leita på feil stad. Ifølgje han ligg plasten i fjøra ved saga hans, vidare utover mot Blyberg og i fjøra på andre sida mot Norheimsund. Han forklarer at straumen dreg med seg avfallet. Noko vert skylt opp på land, og så vert det drege utover igjen. Han fortel at noko av plasten ligg under sanden, medan mykje allereie er oppløyst i små bitar.

– Hadde heradet spurt på førehand, kunne eg ha vist dei kvar dei skulle leita, seier Byrkjeland.