Usamde om rekningar i Skutevik-sak
Tørvikbygd Båtlag meiner advokatrekningar er altfor store og vil ikkje dekkja alt. Kvam herad nektar å fira på krava.
Båtlaget har fått to rekningar frå Kvam herad i postkassen det siste året. Båe gjeld advokatkostnadene til fleire grunn- og rettseigarar i Skutevik i samband med saka om oreigning i området. Heradsstyret sa nei til å oreigna rettar på vegner av laget.
Båtlaget ser ikkje nokon grunn til å betala rekningar for motparten, og sette seg imot krava. Laget meiner at rekningane er altfor store, ikkje minst med tanke på kompleksiteten i saka og at advokatane kjende godt til henne frå tidlegare arbeid knytt til rettssaka om båthamna i Skutevik.
Båtlaget føreslo nyleg at laget kan dekkja 20.000–30.000 kroner av dei to rekningane. Til saman, med renter og gebyr, har dei vakse til vel 66.000 kroner.
Anna tolking
Laget har via advokat vist til at laget bad Kvam herad om hjelp til å oreigna rettar for å gjennomføra reguleringsplanen for Skutevik og få båthamna lovleg plassert.
Heradet fekk i samband med oreigningssaka stadfesta at båtlaget skulle dekkja alle kostnader med oreigninga. Advokaten meiner at lovnaden ikkje omfattar kostnader for motpartar før det er gjort vedtak om oreigning og skjøn.
Kvam herad held fast ved sitt standpunkt, og viser til føringar i oreigningslova: Kostnadene motparten har hatt med å gje uttrykk for meiningar i prosessen og sikra «baten» sin i saka, må oreignaren dekkja. Rådmannen meiner det ikkje er korrekt at båtlaget berre har teke på seg å dekkja kostnader knytt til eit skjønskrav og etter eit positivt vedtak om oreigning. Ho viser til at laget har teke på seg «kostnadene knytt til ekspropriasjon».
Om laget ynskte andre vilkår, måtte det ha sagt frå om det, meiner rådmannen, som meiner båtlaget måtte leva med risikoen for at det ikkje vart oreigning.
– Blankofullmakt
Båtlaget held fast ved at det ikkje vil betala nokon av rekningane. Borgen Advokatar AS skriv på vegner av laget at laget altså trudde det var kostnadene med sjølve oreigninga det tok på seg å dekkja. Det vil såleis vera særs urimeleg å krevja inn pengane, meiner laget.
– For båtlaget verkar det som om heradet berre har sendt dette vidare til båtlaget, utan å ta stilling til om dette er naudsynte utgifter. Det synest som om heradet har gjeve ei form for blankofullmakt for grunneigarane til å kunna påføra båtlaget utgifter det ikkje kan påverka, skriv advokaten.
Heradet bad nyleg båtlaget om å betala rekningane innan kort tid. Elles vil rådmannen gå til søksmål mot båtlaget for å få tak i pengane.
Ordførar heilt med
Rekninga vart drøfta i eit møte mellom teknisk sjef, advokatfullmektig Karoline Borthen og ordførar Torgeir Næss hausten 2022. Dei tok saman avgjerda om å senda henne vidare til båtlaget.
Årsaka til at ordføraren vart teken med på råd, er at rådmann Anita Hesthamar har sagt seg ugild i oreigningssaka som fylgje av koplingar til fleire partar.
