Usamde om innkjøp og utslepp
– Om dette er ein dieselbil, bør me ikkje kjøpa han.
Kari Mostad (MDG) meiner det er feil å kjøpa den leasa varebilen – ein Ford Transit frå 2016 – som mellom andre trivnadsvaktmeistrane til Kvam herad nyttar. Årsaka er at han ikkje er utsleppsfri og dimed ikkje bidreg til vedtekne mål om utsleppsreduksjon.
– Eg vil sjå det
Synspunktet møtte motbør då formannskapet drøfta kjøp av bilen 23. november. Jostein Ljones (Sp) påpeika at det er skilnad på å kjøpa ein flett ny bil og å kjøpa ut ein eksisterande bil frå ein leasingavtale.
– Eg vil sjå den miljørekneskapen, sa han.
– Me kan leasa ein ny bil som er klimanøytral. Det kan ikkje vera slik at me skal ta ansvar for alle gamle bilar til dei er bruka opp, sa Mostad.
Også varaordførar Frode Nygård (Frp) argumenterte for kjøpet. Han meiner det er smart å bruka opp køyretøy, og at bilar med fossilt brennstoff difor ikkje alltid kjem dårleg ut med tanke på klimaet.
Vel 250.000
Den aktuelle varebilen har lasterampe og er ein «spesialbil». Rådmannen har studert doningen og konkludert med at det er tenleg å kjøpa han ut frå pris, levetid og behov. Prisen er 256.383 kroner som ifylgje framlegget skal lånast. Den årlege leiga i leasingavtalen er 68.500 kroner.
Ifylgje rådmannen vil heradet sleppa å betala 20.000–30.000 kroner for mindre skadar på bilen om ein kjøper han.
Framlegget til Mostad handla ikkje berre om den aktuelle varebilen, men slår fast at heradet ikkje går «til innkjøp av bilar som ikkje er klimanøytrale». Ingen andre støtta det. Heradsstyret får siste ord i saka 8. desember.
