Uroa over brunn
Marta Holmefjord er redd for at ein brunn på Kvamskogen kan vera til fare for dyr og menneske.
Det skriv ho i ei uromelding til Kvam herad. Brunnen er truleg bygd på 1940-talet, skriv ho. Han skal ha vore knytt til ein garasje Statens vegvesen hadde ved vegen, og kanskje til ei hytte i nærleiken. Brunnen er svært stor og djup, og er dekt med gamle blikkplater oppå gamle dragarar eller liknande, skriv Holmefjord.
Ifylgje henne har ikkje brunnen vore halden ved like på mange år. Ingen har ansvar for han, hevdar ho.
– Mi bekymring er om dyr eller folk går oppå og fell nedi. Det kan verta katastrofalt, skriv Holmefjord, som vonar at heradet kan hjelpa.
1. juli informerte Kvam herad grunneigaren om bekymringsmeldinga. For heradet er det ikkje klart kven som eig eller har ansvar for brunnen, men rådmannen skriv at grunneigaren i utgangspunktet har ansvar for han.
– Me ber om at det vert sett i verk tiltak for å sikra tanken, skriv rådmannen.
Kvam herad har ikkje hatt med brunnen å gjera, men i arkivet er han nemnd i 1972. Då fekk bygningsrådet ein klage på eit nabovarsel om brunnen. «Statens vegvesen sin vassbrønn», vart han omtala som den gongen.
