Unngå at hyttekjøpet blir eit mareritt
Nordmenn er på hyttejakt denne sommaren. Salet av hytter har gått kraftig opp samanlikna med i fjor. – Sjekk hytta godt før du kjøper ho, er rådet frå forbrukarsjef Carsten Pihl i Huseierne.
– Det er viktig at ein sjekkar tilstanden til hytta godt før ein legg inn bod. Dermed unngår ein at drøymehytta blir eit mareritt, seier Carsten Pihl, forbrukar- og kommunikasjonssjef i forbrukarorganisasjonen Huseiernes Landsforbund i ei pressemelding.
I mange hyttekommunar kan det vere strenge reglar. Det er ikkje sikkert at det er så lett å få bygd på hytta om ein synest ho er for lita.
– Det er også lurt å sjekke kva for moglegheiter det er for å byggje på eller endre fasaden. Nokre kommunar er ganske strenge, så sjølv det å få inn større vindauge kan bli ei utfordring og krevje mykje papirarbeid, åtvarar Carsten Pihl.
Han tilrår også å leite etter fukt. Hytter ved sjøen står ofte i meir fuktig klima og meir vêrharde område enn vanlege bustader. Derfor er det viktig å sjekke nøye korleis tak, kjellar og kledning er.
– Ein del eldre hytter er også bygde i etappar, og ofte på dugnad. Då er overgangen mellom dei ulike etappane stader ein skal sjekke ekstra nøye, fortel Pihl.
Han oppfordrar elles til å lese salsdokumenta nøye:
– Les særleg tilstandsrapporten og eigenerklæringa til seljaren for å få vite den tekniske tilstanden. I beskrivinga til eigedomsmeklaren vil ein for eksempel kunne finne oversikt over kva for rettar som følgjer med hytta, seier Phil.
7 punkt på sjekklista før hyttekjøpet
1. Taket: Sjekk takbelegget og kryploftet. Sjå etter lekkasjespor innvendig.
2. Kjellar/krypkjellar: Sjå etter fukt / vass-skadar.
3. Utvendig kledning og vindauge: Kor gamle er vindauga? Sjekk kledningen, og særleg nedst mot grunnmuren. Ròte er eit dårleg teikn, medan manglande måling er forholdsvis enkelt å gjere noko med.
4. Vatn og kloakk: Er hytta kopla til det kommunale vass- og kloakkanlegget eller er det brønn og septik? Kjem det då pålegg om tilkopling om nokre år? Det vil koste pengar!
5. Tomta: Få klarlagt kvar tomtegrensene går: Nokre gonger er det gjerde, men det er ikkje gitt at grensa går der.
6. Området rundt: Er det planlagt for fleire hytter, eller vil omgjevnader bli verande som dei er?
7 Brygge / strand / veg: Følgjer det rett til kaiplass eller strandrett med hytta? Slike rettar skal det opplysast om i salsoppgåva.
Kjelde: Huseigarane
(©NPK)
