Unge ynskjer leksefri skule
Kvam ungdomsråd meiner at mindre eller ingen lekser på mellom- og ungdomstrinnet vil gagna Kvam.
• Ungdomstrinnet bør vera leksefritt.
• Mellomtrinnet bør ha mindre lekser og meir rettleiing og oppfylging.
• Småtrinnet bør ha lekser som i dag.
Desse synspunkta fremja Hallvard Valland Nordheim og Alexander Nicholas Nordlinder Nitter på vegner av ungdomsrådet før budsjettdebatten i heradsstyret 12. desember.
Dei føreslegne endringane kan spara heradet for pengar, gje lærarane høve til å nytta meir tid til fagleg førebuing, oppfylging av enkeltelevar og andre oppgåver, og sikra dei eldre elevane tid til å gjera seg klare for vidaregåande skule og arbeidslivet, skriv rådet i budsjettfråsegna.
Linda Haugland Jondahl (Ap), som er både folkevald og rektor på Norheimsund skule, sa i heradsstyredebatten at ho er heilt samd med ungdomsrådet i synet på leksene.
– Og det seier eg, som er rektor. Eg har mange elevar på min skule som har sagt at dei ynskjer leksefri skule og har gode argument. Tida er inne for å ta den store leksedebatten. Me får ikkje teke han i dag, men han vil koma, sa ho.
