Unge tok kontroll over hotelldrift: – Får sommarfuglar i magen av sånt

Måndag morgon i førre veke tok dei tilsette som er under 30 år over ansvaret for å leia og driva Hardangerfjord Hotel. I mars fekk gjengen beskjed om at dei skulle ta over alt ansvar for planlegging, marknadsføring, sal og drift av hotellet i ei heil veke, utan å ha den vanlege leiargruppa til stades.

– Oppgåva handlar i hovudsak om rekruttering og det å byggja vidare på dei unge talenta me har, forklarar hotelldirektør Tanja Borge.

Fullt program

Lunsj for nokre busslass med turistar, barnediskotek, hagefest og ettermiddagste var nokre av arrangementa som vart stelte i stand av den mellombelse leiargruppa.

Fredag ettermiddag var det to travle, unge damer som slo av ein prat med lokalavisa. Malene Rogdaberg Trå, som til vanleg er assisterande restaurantsjef og kokkelærling, gjekk inn i rolla som event- og marknadsansvarleg. Saman med henne var hotelldirektør Synne Gule, som vanlegvis tek seg av resepsjon og booking.

Dei hadde nyleg rydda vekk etter at 160 cruiseturistar hadde vore innom til lunsj. Måltidet omtala dei som historisk, og viste til at det er fem år sidan dei sist hadde ei liknande bestilling.

— Elskar sånt!

Gule vedgår at ho fyrst vart litt paff då ho fekk oppgåva i mars.

– Me var fleire som var samla i restauranten. Eg såg meg rundt og tenkte: «Kor gamle er desse kollegaene mine eigentleg? Kor mange andre enn meg er under 30?» I byrjinga frykta eg at eg nesten var den einaste, fortel Gule.

Ifylgje Trå tok det ikkje lang tid før ideane byrja å ramla inn.

– Eg blir full av sommarfuglar i magen av sånt. Eg elskar det! seier Trå.

Til saman vart den unge leiargruppa ein gjeng på ni personar som delte idear og tankar, og dessutan fordelte rollene for veka som venta. Fleire av dei er tilsette på hotellet i Øystese, men det har òg kome krefter innom frå dei andre Fjordtind-hotella i Hardanger: Brakanes Hotel i Ulvik og Vøringsfoss Hotel i Eidfjord.

Plan B

I slutten av mars samlast gruppa til pizza og idémyldring. Fyrst tenkte dei stort og ynskte å skipa til ein mat- og drikkefestival — Fjordtindfestivalen — for alle i Hardanger. Men då dei skjøna at det ville kollidera med den internasjonale siderfestivalen i Odda, bestemte dei seg for å leggja om planane.

I eit nytt møte i april landa dei på at dei ville tilby noko til lokalbefolkninga. Gjengen laga seg ei oversikt over arrangement dei ville stella i stand og alt som måtte ordnast. Og brikkene fall på plass – ei etter ei, fortel Trå.

– Fyrst var me førebudde på at det ikkje ville verta like bra som hovudplanen. Men alle me kontakta svara ja med ein gong, så det meste var på plass innan om lag eit døgn, seier ho.

— I eit vakuum

Starten måndag var nokså overveldande, ifylgje dei to unge damene.

– Me gjekk vel rundt i eit slags vakuum, der me ikkje visste heilt kvar me skulle byrja, seier Trå.

Det tok ikkje lange stunda før gruppa fekk testa seg. Tysdag tikka det altså inn ein e-post med ei lunsjbestilling til 160 gjester. I byrjinga trudde Gule at det var ein spøk.

– Eg var sikker på at det var dei eldre i leiinga som tulla med oss. Men så skjøna eg at det var alvor, og tankane byrja å kverna: «Har me kapasitet? Har me varer? Rekk me det dersom me bestiller no?» fortel Gule.

Avgjersla vart teken, og lunsjen vart gjennomført. Og det heile gjekk knirkefritt, ifylgje Gule.

Auka forståing

Fredag ettermiddag var dei mest spente på korleis gjennomføringa av barnediskotek fredag og hagefest laurdag ville gå. Ikkje visste dei kor mange born som var lystne på dans og leik, og ikkje visste dei om vêrgudane ville spela på lag då dei laga klart til fest i hotellhagen. Men optimisme mangla det ikkje på, og båe vona at alt skulle ordna seg.

I løpet av veka har kvar og ein fått prøva seg i nye roller. Til dømes har ein reinhaldar fått ansvaret som husøkonom og ein soussjef som teknisk sjef.

Ifylgje Trå ynskte alle i gruppa å spela på kvarandre sine styrkar, samstundes som dei ville prøva noko nytt då dei fordelte rollene. Ho trur at dei tilsette kan læra mykje av å verta betre kjende med dei ulike avdelingane på huset, og at ein vil få ei betre forståing for arbeidet til kollegaene.

Skapar samhald

Båe tykkjer at det å få eit slikt oppdrag, med så mykje ansvar, har vore med på å styrkja kjensla av det å vera eit lag. Oppgåva har gjort dei unge meir samansveisa, meiner Trå og Gule.

– Men korleis taklar leiinga at de har overteke ansvaret?

– Eg trur dei lurar fælt på korleis det går. Nokre av dei har vore innom oss eller sendt e-postar, fortel Gule.

Ho og Trå er glade for tilliten dei får, og dei rosar leiinga, som har støtta og heia på gruppa etter at dei unge overtok styringa.

– Full tillit

Hotelldirektør Tanja Borge har opphalde seg på hytta medan dei unge har styrt hotellet. Ifylgje henne sjølv har ho vore overraskande roleg denne veka. Ho har full tillit til gjengen som har overteke styringa.

– Det er ein veldig kreativ gjeng som har mange gode tankar, seier Borge

Ifylgje henne var det dagleg leiar Bjørn Laszlo Kovacs i Fjordtind Hotels AS som kom med forslaget om hotellovertaking på ei direktørsamling. Ideen fekk han etter at lærlingane på hotellet i Øystese hadde gjennomført ein vellukka lærlingmiddag i januar, der dei stelte i stand ein middag med fire rettar for 50 gjester, fortel Borge.

– Meir enn innsjekk

Hardangerfjord Hotel, som er eitt av dei tre Fjordtind-hotella, har den yngste staben, og vart difor hotellet som skulle få utfordringa, forklarar Borge. I tillegg henta dei inn unge tilsette frå dei to andre hotella.

– Me ynskjer at dei skal få kjenna på kor mykje arbeid det er som ligg bak det å driva eit hotell. Det er så mykje meir enn berre innsjekk og servering, seier Borge.

I tillegg til at dei unge skal få utfordra og utvikla seg, vonar hotelldirektøren at også dei som er hakket eldre, vil få utbyte av opplegget.

– Kanskje dei vil setja i gang noko som me kan byggja vidare på i framtida? seier Borge, som sjølv hadde planar om å ta turen på hagefesten laurdag — som gjest.