Unge drøfta utanforskap

Møtet, som var ein såkalla Allemed ung-dugnad, gjekk av stabelen torsdag 13. april. Elevar frå ungdomsskulane og dei vidaregåande skulane var inviterte. På agendaen stod seks problemstillingar, såkalla casar, som dei unge skulle drøfta i grupper. Kvar problemstilling handla om ein fiktiv person og kva som hindrar vedkomande i å delta på fritidsaktivitetar.

Fritidskoordinator i Kvam, Kristin Lundblad, fortel at problemstillingane tek utgangspunkt i innspel og erfaringar frå ungdommar i Kvam.

Dei unge drøfta mellom anna kva som kan gjerast når unge ikkje kan delta på fritidsaktivitetar fordi utstyret eller reisene kostar for mykje. Dei drøfta korleis einsemd og utanforskap kan hindra deltaking. Også mangelen på uformelle møteplassar vart drøfta.

– Mange gode forslag

Bak arrangementet stod Kvam ungdomsråd og Kvam herad. Malene Utskot er nestleiar i Kvam ungdomsråd. Ho skriv i ein e-post at ho tykkjer mange gode forslag vart lanserte.

– I oppgåva om utestenging og einsemd vart det til dømes sagt at utekontakten har ei viktig rolle. Det å ha ein trygg vaksen å snakka med, er veldig viktig. Det kom òg fram at ungdomane ønskjer seg fleire uformelle møteplassar og aktivitetar utan fokus på konkurranse, skriv ho.

Dugnadsdeltakarane føreslo at fritidskortet bør kunna brukast til å finansiera utstyr og reiser. Dessutan vart det føreslege at unge som ikkje har råd til utstyr og reiser, kan skaffa seg ein jobb.

– Eg trur mange unge som ynskjer å jobba, slit med å få seg jobb. Dette kunne kanskje kommunen ha gjort meir med, til dømes gjennom å tilby kommunale sommarjobbar til ungdomar under 18. Sidan ikkje alle har høve til å jobba, bør det vera støtteordningar som får ned kostnadene, skriv Utskot.

Freistar få alle med

– Me tek det med oss

Ungdomsrådet hadde ansvaret for å gjennomføra dugnaden. Lundblad var imponert over korleis oppgåva vart handtert.

– Dei hadde full kontroll og gjennomførte på ein utruleg flott måte. Det er ikkje ofte det tekniske i heradsstyresalen har fungert så godt som denne dagen, seier ho.

Lundblad lovar at tankane til dei unge ikkje berre skal gøymast i ein skuff.

– Du kan ikkje setja ungdomen i sving på denne måten utan at det får ei reell betydning. Me som jobbar med dette, skal ta innspela deira med vidare, seier ho.