Grensa for løyve til å skyta hjort bør reduserast, og det bør verta gjeve minimum eitt hjorteløyve per 500 dekar utmark.
Det har Ullensvang ungdomsråd vedteke å føreslå for viltansvarleg Rolf Erling Loe i eit brev.
I dag er det løyve på eitt hjortedyr per 1.000 dekar.
Bakgrunnen for forslaget er at hjortestamma i gamle Jondal kommune er på veg opp. Avlingsskadane på dyrka mark er store i enkelte område. Når hjortestamma aukar, fryktar ein meir kamp om maten for dyra. Dette kan føra til mindre og magrare dyr, noko som ikkje er bra for dyrevelferda. Det vil òg føra til uakseptabel ulempe for dei som vert utsette for avlingsskade på dyrka mark, skriv ungdomsrådet.
I fjor vart det felt 230 hjortar i Jondal. Det er om lag ti prosent av dyra som er registrert observerte. Ein reduksjon i arealkravet kan redusera skadane på slåttemark og innmarksbeite, meiner ungdomsrådet, ifylgje rådssekretær Vibeke Lynghammer.
