Ung fritid på båttur
Fartøyvernsenteret i Norheimsund vart onsdag nytta av Ung fritid til familiedag med leik, moro og båttur.
Dagen var eit haustferietilbod i regi av Ung fritid i Kvam herad, som arrangerer gratis aktivitetar i feriar og jobbar med at alle unge skal få høyra til i eit fellesskap der dei får oppleva meistring og glede.
– Me arrangerer det for at alle skal få moglegheita til noko kjekt, seier utekontakt Heidi Aalvik Schelin i Ung fritid.
Onsdag var alle dei 40 plassane tekne, og det var venteliste. Dei som fekk plass, fekk vera med på alt frå å laga armband til rotur. Ute var det både stylter, leiketraktorar og ei aktivitetsløype med ein sjokolademynt som premie til dei som fekk alt rett. Andre laga små båtar av tre og prøvde dei i ein stamp.
Schelin seier at det er kjekt å arrangera slike gratis aktivitetar, og at tiltaket er bra for lokalsamfunnet. Ho seier det er fint å møta familiar som ho ikkje møter til vanleg.
Det vart servert gratis lunsj. Maten skulle eigentleg vore servert om bord på båten «Mathilde», men på grunn av dårleg vêr vart det inne i kafeen, seier Heidi. Inne, vekke frå regnet, fekk dei blant anna steikt kylling og frukt.
Etter lunsj vart fleire med på rotur i båtane til fartøyvernsenteret. Deretter rodde dei ein tur på bukta i Norheimsund.
Mellom dei andre tilboda til Ung fritid i haustferien var kino og turar til ein trampolinepark og Akvariet i Bergen.
Sjå fleire bilete her:
