Ung Fritid Kvam fekk pengegåve

– Mi hjartesak er Ung Fritid Kvam, som kan bidra til eit godt tilbod for ungdom. Det kan gje fine opplevingar med samhald, glede og meistring. Eg tenkjer mykje på at jentene mine skal få ein god oppvekst. Då synest eg det er spesielt viktig at me har eit slikt tilbod i kommunen, skreiv Sjursen i nominasjonen.

Fredag overrekte ho beviset på at fritidstilbodet får 75.000 kroner frå Sparebanken Vest sin adventskalender.

– Eg har blitt tobarnsmor og tenkjer at dette er eit enormt viktig og bra initiativ. Det er bra for mine ungar når dei vert eldre, så det må vera liv i tilbodet dei neste tjue åra òg, seier Sjursen.

– Inga sjølvfylgje

Dagleg leiar i Grannehjelpa, Siriann Lillevik, og utekontakt Ingrid Rivenes tok imot gåva.

– Oi, det var kjekt. No fekk eg ståpels, sa Lillevik.

– Kva skal me finna på no, Ingrid? spurde ho.

I staden for julegåve til dei tilsette får dei tilsette i banken, Eiendomsmegler Vest og Bulder nominera veldedige føremål som kan få ei pengegåve frå banken. Nokre av dei nominerte vart plukka ut av ein komite, og så vart det stemt på kven som skulle få pengane. Totalt delte banken ut tre millionar kroner til 23 føremål.

– Det er inga sjølvfylgje at nokon i området vårt skulle få pengar. Her kjempar ein mot til dømes Kreftforeningen og sjukehusklovnane. Eg er stolt av Siri, som i ammetåka i permisjonstida tok seg tid til å laga video som me kunne stemma på. Det er ho som står bak, seier May Turid Tømmervik, avdelingsbanksjef i Sparebanken Vest i Kvam.

Universelt tilbod

Lillevik seier at det ho synest er bra med Ung Fritid, er at tilbodet er universelt og gjeld alle. I feriane vert det arrangert aktivitetar, slik at alle borna skal ha opplevingar å fortelja om når dei kjem tilbake på skulen etter sommarferien, seier ho.

– Me veit at fleire slit med økonomien, og då er det veldig kjekt å kunna laga til kjekke aktivitetar for dei eller reisa på tur, seier Lillevik.

Tidlegare vart det arrangert fleire turar, men i det siste har Lillevik heller prøvd å «henta» aktiviteten til Kvam. I staden for å reisa til Fana for å spela paintball, kjem dei til Kvam, fortel ho. Då kan fleire born delta. På ein busstur er det berre plass til om lag 50 ungdomar, men eit tilsvarande arrangement i Kvam kan gje plass til 80–90 born, forklarer ho.

Rivenes seier ho byrja i stillinga som utekontakt i august, og at Ung Fritid var noko av det fyrste ho var med på.

– Eg vart veldig imponert. Det er eit bra tilbod, seier ho.

– Me er opptekne av at det skal vera aktivitetar for dei som elskar fart og spenning, men det skal også vera mjuke aktivitetar for dei som ikkje synest fart er så kjekt. Og så prøver me å få til nokre aktivitetar for heile familien, seier Lillevik.

Gratis for alle

Ideane kom på løpande band etter at pengegåva var kunngjord.

– Eg har lyst til å arrangera noko stort og kjekt med kjekke artistar og kjekke aktivitetar som skal vera ope og gratis for alle. Det vert spanande, seier Lillevik.

Ho fortel at ungdomane skal få vera med på å bestemma kva som skal skje og få fortelja kva dei har lyst til å oppleva.

– Det har ungdomane mange tankar om, seier Rivenes.