Undrar seg over «skjulte» bussar
Fleire bussar som går mellom Herand og Jondal, står ikkje oppførte i rutetabellane.
Dette har Gisle Guldbrandsen, som bur i Herand, merka seg.
Så lenge turistbåtruta i Hardanger går, går det ein buss frå Jondal klokka 09.00 som hentar turistar som kjem med båten. Og så lenge skulane er opne, går det ein skulebuss frå Jondal skule klokka 12.50 på kvardagar.
Ingen av desse står i rutene. I tillegg står heller ikkje den siste bussen frå Herand til Jondal i ruta. Den går i staden tom attende til stasjonen i Jondal.
– Kunne vore nyttig
Guldbrandsen tykkjer dette er synd. Han hevdar folk som bur i Jondal eller Herand, kunne hatt bruk for dei «skjulte» bussrutene.
– Til dømes går det ein buss frå Herand til Jondal klokka 07.45 på kvardagar. Morgonfuglar som tek denne kunne handla i Jondal og teke 9-bussen attende, seier han.
Det er Skyss som set opp rutetabellar og i Hardanger, medan Tide Buss AS har kontrakten. Pressekontakt i Skyss, Øyvind Strømmen, opplyser at årsaka til at ikkje 09.00-bussen frå Jondal står i ruta, er at dette er ein buss som, som trass i at den er profilert med Skyss-logo, vert nytta til oppdragsbasert turkøyring for andre Tide-kundar enn Skyss.
Bussen som går frå Jondal skule klokka 12.50, er ikkje å finna i rutetabellen av di dette er ein rein skulebuss som av kapasitetsomsyn ikkje er meint for andre reisande.
Den siste bussen som går frå Herand til Jondal, går ikkje i rute, og kan difor heller ikkje ta med passasjerar.
– Eit kostnadsspørsmål
– For mange verkar det truleg rart at ein buss som likevel skal køyra frå ein stad til ein annan, ikkje kan ta med passasjerar?
– Me kan sjølvsagt forstå at folk lurer på kvifor ein buss køyrer tom, men dette handlar om kva Skyss har bestilt og betaler for. Skyss har kontrakt med busselskapa om køyring av dei rutene me har sett opp. Det er denne ruteproduksjonen me betaler for. Det du eigentleg spør om, er difor ikkje om ikkje ein tom buss kunne ha teke på passasjerar, men om ikkje Skyss kunne ha betalt for ei ytterlegare bussrute, og då med utgangspunkt i kvar Tide har bussen parkert når bussen ikkje er i oppdrag for oss. Ei slik utviding av rutetilbodet er eit kostnadsspørsmål. Det må sjåast i samband med mellom anna kva marknadsgrunnlag og behov som finst, og med kva tilgjengelege ressursar me faktisk har, skriv Strømmen.
