Umogleg å nå klimamål for sjømatnæringa
Det er ikkje mogleg å nå klimamåla i norsk sjømatnæring innan 2040. Noreg manglar straumnett til å byte ut fossilt drivstoff med elektrisitet i båtar, oppdrettsanlegg og fabrikkar.
Ein fersk rapport frå Sintef varslar at energibehovet til sjømatnæringa vil auke frå 2,1 terawattimar (TWh) til minst 7,5 TWh innan 2040. Dette er behovet for elektrisitet som trengst for å redusere klimagassutsleppet frå næringa i tråd med Noregs ambisiøse klimamål.
Dagens straumnett klarer ikkje å møte dette behovet.
– Det er eit stort press på sjømatnæringa om å byte ut fossilt drivstoff med fornybar energi, seier forskar Hans Tobias Slette i Sintef i ei pressemelding.
Mangelen på tilgang til fornybar energi fører til utsette klimatiltak og investeringar i sjømatbedrifter, og straumnettet i kystdistrikta er allereie fullbooka på grunn av elektrifiseringa av transport og industri.
Utan ei rask omstilling og tilstrekkeleg infrastruktur vil næringa ikkje kunne redusere utsleppa sine i tråd med Noregs mål om 55 prosent utsleppskutt innan 2030 og 90–95 prosent innan 2050.
Rapporten understrekar at sjømatnæringa må skifte til alternative energikjelder, men at det per i dag ikkje finst fullverdige, grøne alternativ til diesel.
(©NPK)
