Front mot front i Kvam
To bilar og fem personar var innblanda i ei trafikkulukke på Rykkje laurdag ettermiddag.
Vegen vart stengd mellom Øystese og Fyksesund etter ulukka, melde Vegtrafikksentralen på X klokka 13.50.
Då var naudetatane på veg til staden.
Artikkelen held fram under annonsen.
110 Vest melde klokka 13.56 på X at fem personar var involverte i frontkollisjonen. Alle var då ute av bilane. Dei involverte fekk tilsyn av lege og ambulansepersonell.
Vest politidistrikt melde klokka 14.17 i Politiloggen at det vart store materielle skadar, men at alle involverte var vakne og kunna gjera greie for seg.
Vegen vart seinare opna, fyrst for trafikk ved manuell dirigering og litt før klokka 16 for fri ferdsle.
Politiet fekk melding om hendinga klokka 13.44.
Politibetjent Helene Opsahl-Engen ved Kvam politistasjon opplyser til HF måndag at den eine bilen truleg hadde kome over i motsett køyrefelt. Personane kom frå det utan alvorlege skadar.
