– Ullensvangpolitikar ekskludert
Frp sin einaste representant i kommunestyret i Ullensvang, Finn Hagen, er fråteken medlemskapen i partiet.
Det kjem fram i ei pressemelding, skriv Hardanger Folkeblad.
Anni Skogman, leiar av Frp sitt organisasjonsutval, ynskjer ikkje å opplysa om kvifor Hagen er ekskludert.
Artikkelen held fram under annonsen.
– Etter våre undersøkingar vart det klart at me ikkje lenger kan ha tillit til Hagen, seier Skogman til oddabladet.
Bakgrunnen for eksklusjonen skal vera varsel som partiet har motteke. Også før valet i 2019 storma det rundt Hagen. Det kom då fram at han var dømd for økonomisk kriminalitet og vald.
Også denne gongen står Hagen på 1.-plass på kandidatlista i kommunevalet i haust.
– No må me bruka dei nærmaste dagane på å tilpassa oss den nye situasjonen, seier lokallagsleiaren i Ullensvang Frp, Tormod Iversen, til lokalavisa.
Det er for seint å trekka seg frå vallistene no, slik at Hagen vert partiet sin fyrstekandidat. Hagen er den einaste kumulerte på lista.
Kandidaten seier til oddabladet at han ikkje ynskjer å kommentera saka no.
