– Ullensvang tolkar regelverket rett

Ullensvang kommune har ikkje gjeve Herand Handel AS løyve til å selja alkohol når butikken er ubemanna. Dette sjølv om produsenten av den såkalla RMA-teknologien butikken skal bruka, hevdar at ei rekkje andre kommunar følgjer ein annan praksis.

Rådmannen i Ullensvang grunngjev restriksjonane ved å visa til eit notat frå Helsedirektoratet der direktoratet gjer det klart at sal av alkohol i ubemanna butikk strir mot lovverket.

Avdelingsdirektør Øyvind Giæver i Helsedirektoratet opplyser i ein e-post til HF at rådmannen i Ullensvang har tolka føringane frå direktoratet korrekt. Giæver skriv mellom anna at det ikkje er mogleg å vareta forbodet mot sal av alkohol til ruspåverka personar i butikkar som er ubemanna og berre brukar tekniske løysingar.

Han kjenner til at ein del andre kommunar likevel har gjeve løyve til ubemanna alkoholsal, men har ikkje oversikt over kor mange det dreier seg om.

HF har sjekka korleis liknande søknader er handsama i fire kommunar i nabolaget.

Eksingedalen Snarkjøp AS i Vaksdal kommune har fått løyve til å selja alkohol frå ubemanna butikk, men sidan Helsedirektoratet så tydeleg har gjort det klart at dette bryt med lovverket, valde kommunen å gje eit førebels løyve som gjeld ut 2023. Innan det går ut, skal saka opp til ny vurdering.

Prøveløyve for to–tre år vart òg løysingane Masfjorden kommune, Osterøy kommune og Eidfjord kommune valde då det kom søknader om ubemanna alkoholsal.