Ullensvang sender innspel til turistskattforslaget. Kvam har ikkje hatt tid.

19. november kom nyheita om at regjeringa vil gi kommunar mogelegheita til å innføra turistskatt i form av «besøksbidrag».

I korte trekk går forslaget ut på at alle kommunar skal kunna innføra ei overnattingsavgift på inntil fem prosent. Det vil seia at alle besøkande som overnattar i kommunen, skal betala den bestemte prosenten av overnattingsprisen direkte til kommunen.

Dette skal gjelda alle former for overnatting gjennom næringsverksemd, som til dømes hotell, campingplass og Airbnb.

No vil regjeringa ha innspel om turistskatten, før framlegget skal handsamast til våren.

Fleire utfordringar

Mange kommunar har i fleire år ønskt ein turistskatt, for å bøta på slitasjen som turismen fører med seg. Men forslaget frå regjeringa har fått ein til dels lunken velkomst.

Ullensvang er ein av kommunane som peiker på fleire svakheiter i det. Rådmann Ole-Jørgen Jondahl har utarbeidd eit høyringsnotat som han foreslår å senda til regjeringa.

Her kjem det fram at han er generelt positiv til eit «besøksbidrag», og meiner at det kan ha positive ringverknadar:

• Skapa inntekter til fellesgode og tilrettelegging

• Bidra til ei meir berekraftig reiselivsnæring

• Forbetra lokalsamfunn og forbetra turistopplevinga

Dårlegare sider

Samtidig meiner rådmannen i Ullensvang at forslaget har fleire utfordringar:

• Besøksavgifta vil ikkje omfatta cruiseturistar, «villcamparar» og dagsreisande.

• Yrkestrafikken blir skattlagd. Ein vil ikkje kunna skilja mellom overnatting knytt til yrkesreiser og turistreiser.

• Auka kostnadar for turistane kan gjera Ullensvang mindre attraktiv som reisemål.

Administrasjonen tar i høyringsnotatet til orde for to endringar i turistskattforslaget:

• Sikra at lova opnar for å skattlegga også cruiseturistar, dagsreisande og «villcamparar».

• Høve til å differensiera avgifta ut frå sesong. Kommunen vil ha mogelegheita til å krevja skatten i høgsesongen, men ikkje i lågsesongen.

Næringsminister Cecilie Myrseth (Ap) og regjeringa har også sagt at dei etter kvart ønsker å innføra ein turistskatt på cruisenæringa, men ikkje i denne omgang.

Ullensvang sitt forslag til høyringsnotat skal handsamast i kommunestyret 18. desember, før det eventuelt vert sendt til regjeringa.

– Bør openbert verta omfatta

I Kvam har også ordførar Torgeir Næss blanda kjensler for turistskatten.

– Eg må seia at eg ikkje har sett meg veldig godt inn i det, men på generelt grunnlag meiner eg at cruisenæringa heilt openbert bør bli omfatta.

I tillegg meiner han at inntektene som kommunen får frå skatten, bør vera øyremerkte til å dekkja kostnadar knytte til turistnæringa, altså at pengane må bli brukte til det formålet.

Heradsstyret hadde møte 12. desember. Turistskatten stod ikkje på saklista.

– Kjem Kvam herad til å senda innspel til regjeringa, slik som Ullensvang?

– Eg er ikkje kjend med at det blir jobba med eit høyringsinnspel. Det er i så fall administrativt.

– Men eg merkar meg at regjeringa har sett ein rimeleg kort frist. Det er jo eigentleg ikkje haldbart å halda den fristen, seier Næss.

3. januar er fristen regjeringa har sett for å senda innspel om forslaget.

Rådmann Anita Hesthamar opplyser at administrasjonen i Kvam ikkje jobbar med eit høyringsinnspel.

– Me får rett og slett ikkje tid. Høyringsforslaget må eventuelt handsamast politisk. Det går ikkje før fristen går ut, seier ho.