Tysdag vert hf.no fornya
Hektisk møteverksemd og ein dose stress og kaos har prega kontoret til HF den siste veka.
Snart vil også lesarane merka endringane. Tysdag kjem vonleg den nye HF-appen i drift, og nettavisa får ny utsjånad.
Dette inneber at du som allereie har ein digital brukar på nettsida, må stadfesta brukaren. Dei som ikkje har ein slik brukar frå før, kan oppretta ein med e-post eller telefonnummer og så kontakta HF for å tilgang til alt på nettstaden. Om du ikkje får til å oppretta ein brukar, kan avisa hjelpa deg med det òg, fortel dagleg leiar og eigar Camilla Skaar Ljones i HF.
Frå og med onsdag ligg alle artiklane bak den nye «betalingsmuren» på nett. I papiravisa vil du fyrst sjå endringar fredag.
Ljones vonar at lesarane vil setja pris på dei oppgraderte løysingane, ikkje minst på nettsida.
Bakgrunnen for endringane er overgangen frå leverandøren Polaris Media til Mentor Medier.
– Ber om orsaking
I praksis betyr omlegginga at alle funksjonar som redaksjonen hadde i det gamle systemet, må flyttast over i det nye. I tillegg til å finna ut korleis ting fungerer og kva som manglar, skal lesestoff til avisa helst produserast som normalt.
– Det er litt kaos nett no. Eg ber om orsaking for at me ikkje klarar å fylgja med på og omtala alt som skjer rundt oss nett no, anten det gjeld langrenn, politikk eller andre ting. Eg vonar lesarane har litt tolmod med oss, for systembytet krev ein del i ein liten stab, seier redaktør Sigbjørn Linga.
Fotoarkivet til HF, med om lag 56.000 bilete, vert flytta over på ei ny plattform. Alle tidlegare publiserte saker med tekst og bilete vert overførte mellom systema. I tillegg kjem saker som ikkje har fått plass på papiret endå, som også må få plass i det nye systemet gjennom manuelt klipp-og-lim-arbeid i regi av redaksjonen.
Redaktøren seier at overgangen har teke mykje tid, men at innsatsen til medarbeidarane betalar seg i form av at det så langt ser ut til å gå greitt. Det som for han vanlegvis er skrivetid, har i det siste gått med til å læra å bruka ny programvare, testa at alt fungerer og kvalitetssikra standarden på alle funksjonane avisa ynskjer.
– Eg har ei rekkje gode sitat til deg om denne prosessen, men ingen av dei eignar seg på trykk, seier grafisk designar, Kristina Sofie Kvåle.
Ho har hatt ansvar for å finna ut korleis avisa, nettavisa og appen skal sjå ut for lesarane. Det har vore nokre utfordringar på vegen.
– Alt er stress
Det er ikkje berre dei synlege produkta som får nye system. Endringane gjeld også abonnementstenester og annonsesystem. Difor er stressnivået litt høgt også i marknadsavdelinga.
Annonsar skal som vanleg publiserast både på papir og digitalt, og fakturaer skal sendast i rett system til rett tid. I tillegg må arbeidarane setja seg inn i, og læra å nytta, dei nye systema.
– Alt er stress, seier annonsekonsulent Hilde Saxsæter.
Den nye plattforma er snikra saman av fleire delleverandørar som gjerne har éin ekspert på sitt område. Å finna ut kven som kan svara på kva har difor vore ei utfordring, men målet er at lesarane ikkje skal lida.
– Me håpar at lesarane er tolmodige med oss ei stund. Det er mykje som skal på plass, og det kjem til å verta litt «klur». Det er sikkert som banken, men me lovar å gå kappgang over kneika, seier Ljones.
