— Turistveg bør lengjast til Strandebarm
Kva skal til for å inkludera den ytre delen av Hardanger i turistvegen? Kva kan gjerast for å få på plass rasteplass ved Skjering?
Desse spørsmåla stiller Olav Sletvold i Strandebarm Utvikling (SU) og Lene Tørvik i Strandebarm Grendeutval i eit straumbrev til ordførar Torgeir Næss (Ap). Dei tek til orde for å lengja Nasjonal Turistveg Hardanger mot sør.
Ved Oma ligg eit svært populært fotoobjekt, Omaholmen, som viser naturkvalitetane i Hardanger.
— Berre av den grunn burde turistvegen gå gjennom bygda, skriv Sletvold og Tørvik.
Ymse frå fortida
På Tangerås finn me heimstaden til diktaren Hans Ernst Kinck, og på Fosse vaks dramatikaren Jon Fosse opp. På Hjartnes er det restar etter ein tysk leir frå krigen, med grunnmurar, bunkerar og kanonstillingar. Her budde over 120 mann.
— Denne staden kan på lang sikt kanskje utviklast og gjerast tilgjengeleg som kulturminne. Også her kan det vera rasteplass, skriv dei to.
Her er fleire historiske bygningar; den fyrste banken i Strandebarm, Vikibui og Kapteinsgarden.
På vegen mellom Oma og Mundheim ved Hamn, Hofn, eller Hobm, som ein seier lokalt, finst restar etter eit langnaust i ei av skipreidene i Hordafylke der leidangen hadde langskip på 1200- og 1300-talet.
På Berge og Breievne er det funne helleristingar som er tre tusen år gamle. Særleg funnet på Berge er omfattande, med over 60 figurar.
Vil ha bort anleggsområde
Ved Skjering er fylkesvegen halvvegs gjennom fjellet. Ved å ferdigstilla vegen vert det ifylge brevet til heradet betre flyt i tungtrafikken, av di ein unngår fartsreduksjon gjennom svingen. Dessutan utløyser tiltaket ledig areal til rasteplass. Neset nedanfor svingen er friområde, med fiskeplassar, badeplass og grillplass og gravrøyser frå vikingtida. Området kan oppgraderast og utviklast om rasteplassen kjem, meiner avsendarane.
— Me oppmodar om at det blir arbeidd for å lengja Turistveg Hardanger, ferdigstilla svingen gjennom Skjering og endra karakter på området frå å vera eit anleggsområde til å verta ein fin, funksjonell og god veg med rasteplass for friområdet i Skjering, skriv Sletvold og Tørvik.
SU har som føremål å fremja ei positiv utvikling når det gjeld næringsliv, busetnad, offentleg sørvis, fritid og kultur, klima og miljø på strekninga Ljones–Gravda, opplyser Sletvold. SU skal medverka til å samordna og forsterka interessene til innbyggjarane i området. Organisasjonen er partipolitisk nøytral.
