Turistskatten vert endra og sett til 3 prosent

– For å redusere belastninga for overnattingsbransjen blir satsen redusert frå 5 til 3 prosent, opplyser regjeringa i ei pressemelding.

Det blir opna for at skatten kan sesongjusterast. Det skal framleis vere frivillig for kommunane om dei vil ha skatten.

– Noreg er eit populært reisemål, og det er kjempebra. Samtidig er det rimeleg at dei besøkjande i større grad bidreg til arbeidet i kommunane med å leggje til rette for nødvendig infrastruktur i område med høgt press, noko som har vore utfordringar nokre stader. Forslaget til eit besøksbidrag som kommunane frivillig kan innføre, skal sikre betre tillit mellom lokalbefolkninga og besøkjande, seier næringsminister Cecilie Myrseth (Ap).

Vil greie ut bidrag for cruiseturistar

Regjeringa foreslår framleis at cruiseturistar skal ha unntak frå reglane, men dette vil dei også gjere noko med.

– Innføring av eit kommunalt besøksbidrag på overnatting, er første fase av besøksbidragsprosjektet til regjeringa. I fase to vil departementet greie ut besøksbidrag frå cruiseverksemd, med mål om å innføre dette, skriv departementet.

– Vi vil ha ei løysing som omhandlar cruise, som fleire har etterlyst. Det vil vi følgje opp så snart som mogleg, seier Myrseth.

Bubilar og teltturistar vil også framleis sleppe turistskatt, men ikkje folk som overnattar i campinghytter.

– Når det gjeld utfordringane knytte til bubilar og villcamping, løyser vi ikkje desse nødvendigvis berre med betaling. Eg vil oppmode kommunane til å nytte seg av gjeldande handlingsrom til å regulere kvar bubilar og campingvogner kan parkere, seier næringsministeren.

Må ha plan for pengebruken

Regjeringa vil også stille krav til at kommunar som vel å innføre turistskatt, må utarbeide ein plan for bruken av inntektene. Her skal næringslivet få komme med innspel.

– Skal reiselivsnæringa halde fram med å vekse, må dette skje innanfor berekraftige rammer. Vi må ta tak i utfordringane. Besøksbidrag er innført i mange land i Europa. Betaling i samband med overnatting er den vanlegaste forma for besøksbidrag i dei landa som har valt å innføre dette, seier Myrseth.

Strengare på Svalbard

På Svalbard blir det endå strengare reglar enn på fastlandet. Der foreslår regjeringa at skatten skal gjelde også for cruiseturistar. Dei lèt det heller ikkje vere opp til lokalstyret å avgjere om dei vil ha skatten.

– Dei som besøkjer Longyearbyen, må bidra til å finansiere den infrastrukturen og dei tenestene som reiselivet treng. Regjeringa har derfor foreslått at det blir innført ei avgift på overnattingstenester i Longyearbyen, og for kvar passasjer som går i land frå eller går om bord i cruiseskip og ekspedisjonscruiseskip i Longyearbyen, seier justis- og beredskapsminister Astri Aas-Hansen (Ap).

På Svalbard skal inntektene frå skatten gå til offentlege tenester og infrastruktur.

– Infrastruktur som veg, vatn, avløp og energi er ein føresetnad for reiselivsaktiviteten. I tråd med innspela i høyringa kan noko av midlane også brukast til «mjuk infrastruktur» som informasjonstiltak og reisemålsleiing, seier Aas-Hansen vidare.