– Turistnæringa er uføreseieleg
Totalt 178 passasjerar nytta seg av den nye turistbåtruta til stiftinga Litteraturbåten Epos mellom Kvam og Rosendal i sommar.
– Dette er langt under potensialet på 80 passasjerar per dag, skriv Maria Pile Svåsand, dagleg leiar i Litteraturbåten Epos, i ein rapport til Kvam herad.
Kvam heradsstyre løyvde i mai 300.000 kroner – som tilsvarar 1.685 kroner per passasjer i sommar – til nyvinninga. Rådmannen tilrådde halvparten.
Turistruta hadde start i Øystese og stopp i Norheimsund og Strandebarm på veg til Rosendal. Svåsand skriv i rapporten at båtruta fyller eit hol i turismetilbodet, og at turistane som var med, var både entusiastiske og interesserte. Ruta bind saman to delar av Hardanger som elles manglar samband, meiner ho.
Tilbodet vart likevel stoppa etter sju veker. Då hadde totalt 178 passasjerar løyst billett.
Det var ikkje mogleg å marknadsføra tilbodet særleg på førehand, då klareringa som trongst for å få gå i rutetrafikk, var tre månader forseinka, ifylgje rapporten.
– Ein kan kanskje tenkja at me burde ha venta eit år, men me valde å setja i gang for å kunna gjera oss erfaringar på eiga hand. Turistnæringa er uføreseieleg, og det er vanskeleg å gjera fullgode vurderingar før noko er prøvt, skriv Svåsand.
Kva tilbod båten skal ha neste år, vert vurdert, opplyser ho.
Eit sushicruise til Botnen, eit rekecruise inkludert konsert på Baroniet i Rosendal og ein tur på dagtid under musikkfestivalen Bygdalarm var godt besøkte. To av dei tre turane vart utselde.
