Turistbåtruta skal diskuterast

I fylkeskommunen skal nye båtkontraktar på plass, og i forslaget til vedtak er det planlagt utlysing av turistruta i Hardanger i juni 2024, med startdato 1. april 2027. Målet er å gje reisande eit føreseieleg og driftssikkert tilbod, som er tilpassa reisemønster og gjev moglegheit til å reisa kollektivt i kvardagen, står det i saksutgreiinga. Hovudutval for samferdsle og mobilitet drøftar saka 17. januar.

For turistbåtruta vert det lagt til grunn at kommunane gjennom Hardangerrådet held fram med dagens medfinansiering. Ifylgje framlegget skal rutetilbodet i hovudsak vidareførast, men med rom for justeringar. Fylkeskommunen har til dømes eit overordna mål om nullutslepp som skal leggjast til grunn. Ruta har i dag eit utslepp på om lag fire hundre tonn i året.

Fylket meiner det er teknisk mogleg å oppnå nullutslepp med dagens rutetilbod, men at det vil medføra store meirkostnader. Dessutan ligg ruta, som har ein distanse på om lag ni mil kilometer frå Norheimsund via Ulvik til Eidfjord, på grensa av det som er mogleg å betena med dagens teknologi for elektrisk drift. Lågare fart, ladepausar undervegs og eventuelt batteribyte på vegen kan vurderast, men dette vil gjera båten mindre attraktiv, ifylgje saksutgreiinga.

Båtruta har ifylgje saksutgreiinga vore finansiert med bidrag frå Hardangerrådet på 0,5 millionar kroner og 6,6 millionar kroner frå fylkeskommunen. Dersom fylkeskommunen droppa sitt tilskot til ruta, slik fylkesdirektøren føreslo i haust, hadde kostnaden vorte 2,8 millionar kroner som fylgje av erstatningsplikt for såkalla positiv kontraktsinteresse frå reiarlaget.

I budsjettet for 2024 vart det vedteke å redusera tilskotet til 4,6 millionar kroner i året, altså eit kutt på 2 millionar kroner. Dessutan vart fylkesdirektøren beden om å ha dialog med reiselivet og andre aktørar for å få eit betre og meir saumlast reiselivsprodukt.

I saka om mandat for utlysing vil fylket koma att med ei tilråding om rutetilbod og kva tiltak som er best med tanke på klimagassutslepp. Arbeidet skal gjerast i dialog med Hardangerrådet.

Hardangerrådet meiner båtruta er særs viktig for regionen, og skal diskutera vegen vidare i eit møte i Ulvik 18. januar. Fylkeskommunen stiller med to representantar som skal orientera rådet om ruta.

I ein tidlegare versjon av denne saka opplyste pressekontakt Karoline Rage i Skyss at finansieringa av turistbåtruta i Hardanger kosta Vestland fylkeskommune 6,8 millionar kroner i året. Det stemmer ikkje. Feilen vart retta 18. januar klokka 13.45.