Turistbåt og ferjer kan stå i fare

Ifylgje varaordførar Frode Nygård (Frp) vart framlegget presentert i eit møte i hovudutvalet for samferdsle og mobilitet i samband med 2025-budsjettet og økonomiplanen for 2025–2028 onsdag. Nygård er varamedlem i utvalet og deltok i møtet.

I ei pressemelding skriv Vestland fylkeskommune at driftsbudsjettet førebels ikkje er i balanse. Det inneber at fleire tiltak må til for å redusera kostnadane og auke inntektene.

– Dei siste åra har utgiftene våre til kollektivdrift auka med ein halv milliard kroner. Statlege tilskot for å handtera kostnadene har auka langt mindre. Det seier seg sjølv at dette ikkje går i lengda, seier fylkesdirektør Rune Haugsdal.

Båt og ferjer

I framlegget er det mellom anna føreslege å avvikla den fylkeskommunale ytinga til turistbåten Hardanger. Det vil spara fylkeskommunen for fire millionar kroner i året. Vidare er det føreslege å gå frå to til éi ferje i sambandet Gjermundshavn–Varaldsøy–Årsnes, og å innstilla ferjesambandet Kinsarvik–Utne, for å nemna noko.

Ordførar Roald Aga Haug (Ap) i Ullensvang kommune tok i eit brev til fylkeskommunen onsdag til motmæle. Kommunen kan ikkje akseptera permanente eller mellombelse kutt i rutetilbodet i området, skriv han.

– Sjølv om me har det svakaste kollektivtilbodet, så er det hjå oss ein planlegg for dei største økonomiske kutta, hevdar Haug, som ynskjer eit dialogmøte med fylkeskommunen om saka.

Mogelege busstiltak

Også bussruter på kveldstid kan verta reduserte, og fleire endringar i prisar og struktur er føreslegne i framlegget:

• Prisen på månadskort aukar til 860 kroner.

• Rabatten som gjer det billegare jo oftare du reiser, vert ikkje vidareført.

• Studentrabatt på enkeltbillettar fell bort.

• Sonestrukturen vert splitta, slik at kvar kommune i bergensområdet vert i eiga sone og overgangstida for ein billett i sone A vert redusert til 60 minutt.

– Det er relativt omfattande tiltak me føreslår, understrekar Haugsdal.

Alle tiltaka totalt summerer seg til rundt 130 millionar kroner fordelte på kostnadskutt og takstauke, opplyser han.

Budsjettframlegget skal drøftast av finansutvalet 22. oktober, som skal levera eit forslag til budsjett for 2025 og økonomiplan 2025–2028 etter møtet 13. november. Fylkesutvalet innstiller til fylkestinget, som skal gjera endeleg vedtak i saka 11. desember.