Turgåarar lyt bu seg på periodar med støy
Dei som ferdast i området ved Krokavatnet, kan oppleva periodar med during frå anleggsmaskiner dei komande månadene. Dessutan er turstiane delvis lagde om.
Kraftverksdammane ved Krokavatnet ovanfor Norheimsund vert utbetra i tråd med krav i nye forskrifter. Det gjer at ein må rekna med nokre utfordringar med trafikk og støy i området medan arbeidet held på, opplyser Arne Tillung, administrerande direktør i Kvam Energi AS.
I april sette GBS Entreprenør AS i gang med arbeidet, som er venta å vera ferdig i oktober. Dette fører mellom anna til at den inste parkeringsplassen på Solhaug er sperra av. Han vert nytta til snuplass for betongbilar og omlasting til helikopter. Det gjer til at turgåarar lyt parkera lenger ned i vegen, seier Tillung.
Sperringa av parkeringsområdet gjer også at dei som skal ta seg opp til Krokavatnet, lyt gå ein annan sti det fyrste stykket. Turstien er merkt med skilt ved vegen, i tillegg til raude stikker langs den alternative stien.
Ifylgje Tillung vil det i utgangspunktet ikkje vera aktivitet i anlegget på ettermiddagar og kveldstid. Likevel understrekar han at dårleg vêr og til dømes skodde kan føra til endringar, men det er det for tidleg å meina noko om, seier han.
– Ein del helikoptertrafikk
Då HF var ved Krokavatnet tysdag, heldt arbeidarar på med å armera og klargjera hovuddammen, ein betongdam frå 1941, til støyping. Då hadde dei allereie forsterka delar av han med ei ny betongplate på innsida.
Halvard Kvandal, bas og verneombod i GBS, fortel at prosjektet har gått etter planen så langt. Arbeidet skal vera så klimavenleg som mogleg. Det vert mellom anna nytta lågkarbonbetong, også kalla miljøbetong, til å støypa med, forklarar han. Betongen vert, så langt det lèt seg gjera, frakta med ein heilelektrisk betongbil, den einaste i Noreg, frå Arna til Solhaug. Massen er noko seigare enn vanleg betong, men går fint å støypa med, seier Kvandal.
Tillung fortel at det står att tre dagar med støyping før opprustinga av muren nordaust er ferdig. Støypinga vert gjord ved hjelp av helikopter og tobbe, som er ei heisebytte med tappeluke til masse. Neste runde med støyping er fyrstkomande måndag. Då vil helikopteret frakta massar frå Solhaug til dammen.
Målet er å verta ferdig med opprustinga av hovuddammen innan 7. juli, fortel Tillung. Då ventar fire veker ferie og opphald i anleggsarbeidet.
Lågare vasstand
Etter sommarferien tek entreprenøren fatt på sekundærdammen nordvest, som ligg like ved dagsturhytta. Planen er å ta vare på fronten, ein gamal steinmur, medan det skal støypast betongvegg på innsida, forklarar Tillung. Utpå hausten ventar dimed nye rundar med flyging og helikopter, seier han.
Også ved sekundærdammen er stien mot dagsturhytta delvis lagd om. I området er det skilta til alternativ rute, i tillegg til at vegen er merkt med raude stikker.
Arbeidet med forsterkinga gjer at vasstanden lyt vera lågare enn det som er vanleg om sommaren. Tysdag var vasstanden 8,9 meter under fullt magasin. Ifylgje Tillung vil vatnet truleg vera ni–ti meter lågare gjennom sommaren. Årsaka er at ein er avhengig av å ha plass til mykje vatn om det skulle verta flaum, utan at det kjem opp til dammane, forklarar Tillung.
– Me plar gjera det me kan for at det skal vera god fylling sommarstid. Me vonar folk har forståing for at det er litt annleis i år, seier han.
Sjå fleire bilete frå arbeidet ved Krokavatnet:
