– Tryglavik-sak før september
Innan 2. kvartal komande år skal ei sak om industriområdet i Tryglavik i Jondal leggjast fram for politikarane.
Det vedtok fleirtalet i kommunestyret som eit såkalla verbalpunkt i samband med budsjettet onsdag 18. desember. I fleirtalet sit Ap, H, SV, KrF, INP og Per K. Måkastad (uavhengig).
Reguleringsplanen for industriområdet er enno ikkje klar. Det har det siste året vore arbeidd med konsekvensutgreiingar av det planlagde tiltaket, som er i tråd med den over ti år gamle kommuneplanen for Jondal kommune.
Sp føreslo elles mellom anna å løyva fem millionar kroner ekstra til uteområdet ved Jondal skule, attåt dei fem millionane som rådmannen har føreslege. Det framlegget fekk ikkje støtte av andre parti. Fleirtalet nøgde seg med framlegget frå rådmannen på dette punktet.
Salet av Blåhuset i Jondal, som skal spara kommunen for 250.000 årlege driftskroner frå og med 2026, vart vedteke. Ingen føreslo å droppa det punktet. Det er uvisst kva som vil skje med dei tilsette og med turistinformasjonen i det tidlegare rådhuset. Arbeidet med å avklara det starta ifylgje rådmannen ikkje før budsjettet var vedteke.
Også Arkivhuset i Vik skal seljast. Det skal spara kommunen for 25.000 kroner i året allereie frå og med komande år.
