– Tryggleikskrava er for strenge
Ein må lempa på tryggleikskrava til tunnelane på Vestlandet, for dei står ikkje i stil med pengane som er sette av til oppgradering.
Det seier Jon Askeland, fylkesordførar i Vestland; Marianne Chesak, fylkesordførar i Rogaland, og Line Hatmosø Hoem, fylkesordførar i Møre og Romsdal, i ei pressemelding frå Vestlandsrådet.
Alle dei tre fylka er avhengige av auka statlege overføringar for å kunna fullføra dei noverande krava som staten har pålagt fylkeskommunane.
– Samferdsledepartementet må sjå på om det er mogleg å redusera krava i tunnelane på fylkesvegnettet, samstundes som ein held oppe eit minimumsnivå for trafikktryggleik og framkomst, seier fylkesordførarane.
Krava er baserte på eit EU-direktiv og kom i 2015. Dei gjeld for fylkeskommunale tunnelar som er lengre enn 500 meter og der det i snitt køyrer fleire enn 300 bilar per døger.
Då forskrifta vart vedteken, vart det sett frist om at tunnelane skulle utbetrast før 2020. Fristen vart så lengd til 2025.
Det er svært utfordrande å koma i mål innan 2025, fortel ordførarane. Hovudårsaka er at oppgraderingsprosjekta er meir omfattande og dyrare enn det Statens vegvesen la til grunn, utan at dette er tilstrekkeleg kompensert.
Dei legg til at viss dei strenge statlege krava til sikring vert haldne oppe, er alternativa å utsetja oppgraderinga eller at ho råkar andre viktige vedlikehalds- og tryggingstiltak.
Vestlandsrådet handsama saka om tunneltryggleik på fylkesvegnettet i desember. Temaet vert teke opp att i eit møte 7. februar. Det er sendt ein uttale til Samferdsledepartementet frå rådet om saka.
Vestlandsrådet har 18 medlemer. Representantane er valde av og mellom medlemene i fylkestinga.
