Trur på satsing ved Fossen Bratte
Samnanger kommune har tru på at ein kan gjera fossen på Kvamskogen til ein turistattraksjon.
Ny vegtilkomst og parkeringsplass ved Fossen Bratte vil truleg kosta 23 millionar kroner.
Det opplyser konsulentselskapet HRP AS i ei utgreiing som avisa Samningen skriv om.
I tillegg kjem bygging av utsiktsrampar og andre fasilitetar. Prosjektleiar i Samnanger kommune, Nina Fredriksen, tykkjer likevel at det er verdt å gå vidare med tanken.
HRP meiner prosjektet bør finansierast av det offentlege, medan Fredriksen meiner det må eit spleiselag til, skriv Samningen. Hennar tilråding er at kommunen bør regulera området og samstundes undersøkja kva marknaden meiner om tiltaket.
Reiselivsutviklar Trond Amland la våren 2019 fram ein studie som viste potensialet i området ved Fossen Bratte. Her lanserte han tankar om både utsiktsplattformer, gangvegar, sørvisbygg, restaurant og amfi. Dei 825.000 personbilane som køyrer forbi kvart år, bør kunna gje grunnlag for auka aktivitet og inntekter, sa Amland til kommunestyret i juni same året, ifylgje Samningen.
Både moglegheitsstudien i 2019 og forprosjektet som no er laga, er finansierte med tilskot frå Vestland fylkeskommune. Rådmannen har ikkje funne plass til satsing ved Fossen Bratte i økonomiplanen for 2022—2025, skriv lokalavisa.
Resultatet av arbeidet til HRP har ikkje vore oppe til politisk handsaming enno.
— Me er heilt avhengige av å få andre med oss, seier ordførar Knut Harald Frøland (Bygdelista til Samningen.
