Trur på samverknad for krigsoffer
Hardangerkommunane kan hjelpa ukrainarane betre saman enn kvar for seg, trur rådmannen.
Ho tilrår å løyva 119.000 kroner til kjøp av ein bil og eit straumaggregat til det krigsråka landet. Pengane vil verta formidla gjennom prosjektet Haukeland-Müller-Mowinckel Helsehjelp Ukraina (HMM). Summen utgjer heradet sin del etter hardangerrådsmodellen.
Rådmannen ynskjer òg fullmakt til å løyva inntil kr 200.000 til eventuelle nye, tilsvarande innsamlingar i 2023 som del av samarbeidsavtalen mellom Hardangerrådet og Haukeland universitetssjukehus i prosjektet HMM.
Løyvingane er i framlegget finansierte med disposisjonsfond for ekstra kraftinntekter. Formannskapet drøftar saka onsdag 1. februar, og heradsstyret avgjer henne torsdag 9. februar.
Sjukehuset skal rapportera om framdrift og resultat i prosjektet til regionrådet, og tek ansvar for rekneskapen i prosjektet. Alle innsamla ressursar går uavkorta til ulike sjukehus i Ukraina og til saniteten i det ukrainske forsvaret, men ikkje til våpen eller våpenrelatert hjelp.
Rådmannen meiner det står ei rekkje seriøse og godt organiserte aktørar bak HMM.
– Ved at hardangerkommunane kan samla og koordinera sin innsats, er det sannsynleg at me kan oppnå meir ved eventuell involvering frå næringsliv og innbyggjarar enn ved at kvar enkelt kommune har sitt eige opplegg, skriv rådmannen.
