– Truleg ikkje problematisk
EØS-reglar om offentleg stønad til næringslivet er truleg ikkje noko hinder for å yta nye millionar til Hardangerbadet.
Allereie då Kvam herad vedtok kommunal deltaking i anlegget i 2017, påla heradsstyret å vurdera om driftstilskot til HB er i tråd med ESA-reglane. Vel fire år seinare ligg det enno ikkje føre ei skriftleg utgreiing.
Ei uformell, munnleg utgreiing frå den tidlegare leiinga i Kvammabadet har rådmann Anita Hesthamar fått, røpte ho i formannskapsmøtet onsdag. Konklusjonen er at det truleg ikkje er noko problem å sprengja grensa for såkalla bagatellmessig stønad, som er 200.000 euro over tre år. Dersom heradsstyret løyver to millionar kroner 24. mai, vil denne grensa vera kryssa med god margin, ettersom det i fjor vart løyvt 1,5 millionar kroner til dekning av underskot. I tillegg har politikarane løyvt 700.000 kroner frå kraftfondet til marknadsføring og utvikling av nye tilbod. Hardangerbadet har i vår søkt om 210.000 kroner i ny fondsstønad.
Årsaka til at løyvingane etter rådmannens meining truleg ikkje er problematiske, er at tilskota ikkje påverkar samhandelen i EØS-området og at dei berre går til lokal aktivitet med eit lokalt dekningsområde. Desse er to av kriteria i ein statleg rettleiar på feltet.
Rådmannen, som vedgjekk at temaet burde ha vore omtala i sakspapira, viste til ei sak som gjeld Bømlabadet der temaet er vurdert av overvakingsanlegget ESA. Konklusjonen vart at kommunal stønad til investeringa ikkje var problematisk. Drift av anlegget var ikkje tema i saka.
Også kommunal subsidiering av treningsrommet som er del av tilbodet Hardangerbadet sel billettar til, vart del av drifta. Kvam har fleire andre treningssenter. Inneber det ein mogeleg konflikt? spurde varaordførar Frode Nygård (Frp).
Rådmannen sa at det er opp til heradsstyret å vurdera om dei opplever at dei støttar denne drifta, og påpeika at dei andre sentera, til liks med Hardangerbadet, har fått kommunal koronakompensasjon. Etter hennar syn er stønaden marginal.
I planlegginga av anlegget la initiativtakarane opp til at andre skulle driva senteret. Sjølv om føresetnadene er endra sidan, er det ikkje tenleg å lyfta problemstillinga no, meiner rådmannen.
– Då må me gå inn i alt dei held på med. Eg ser ikkje for meg at det er ein måte å driva på, sa Hesthamar.
