Truleg ikkje oppdrettsnæringa sin feil at laksesesongen kollapsa

Lakseforskarar er usikre på kvifor laksesesongen i år kollapsa. Dei trur ikkje norske oppdrettsanlegg har skulda.

Det skriv NRK.

33 lakseelver vart i år stengde av Miljødirektoratet grunna dårleg fiske. Oppdrettsanlegg har ei negativ påverknad på norsk villaks, men det er lite sannsynleg at oppdrettsnæringa kan forklara den endringa ein ser i år, meiner lakseforskar Kjell Rong Utne.

– Eitt eller anna har skjedd i havet, seier Utne til rikskringkastaren.

Når laksen går ut i havet frå norske elver kan han gå heilt opp til Spitsbergen. Der beitar han, både på plankton og fisk, og elles det som kan vera næring i.

– Viss veksten har vore dårleg, og det ikkje har skjedd i kystnære farvatn, er det nærliggjande å tru at det har vore mindre mat til laksen i dei fjerne farvatna. Det kan vera mindre småfisk som lodde eller nedgang i planter som fisken et, seier Utne.

– Oppdrettsanlegg har jamt over ein negativ påverknad på norsk villaks i store delar av landet, og slik har det vore i mange år. Men det har ikkje vore større endringar i den påverknaden dei siste åra, og det er lite sannsynleg at oppdrettsnæringa kan vera med på å forklara den endringa me ser i år, seier Utne.

(©NPK)