Trødde i gang nytt tilbod

Til å opna det nye spinningrommet vart det valt ut ein representant for det offentlege og ein representant for gjevarane. Det gjæve oppdraget var det ordførar i Ullensvang kommune, Roald Aga Haug, og avdelingsbanksjef i Sparebanken Vest i Kvam, May Turid Tømmervik, som fekk.

«Kva for ei rute skal dei sykla?» spurde nokon frå salen.

– Eg er mest sugen på å vita kor langt me skal sykla, kom det frå ordføraren.

Etter eit minutt sykling med vegen mot Trollstigen på skjermen vart JondalSpinn erklært for opna.

I talen før den offisielle opninga vart trakka i gang, takka Haug alle som har bidrege i realiseringa. Han tykte det var imponerande kva dei frivillige hadde fått til. Leiar i Jondal Idrettslag, Gudmund Toreid, sa at Ullensvang er ein kommune som gjer det lett å driva idrettslag.

– Kommunen er på tilbodssida heile tida. Eg var ein av dei som ikkje var så glad for samanslåinga, men kommunen er fantastisk når det gjeld måten han tek hand om frivillig arbeid og ikkje minst idrettslaget på, sa Toreid.

– Jondal er unik

Ifylgje ordføraren har kommunen ein sterk ambisjon om at idrett og trening skal vera ein av dei viktigaste byggjesteinane for innbyggjarane. Det skal også vera det som gjer kommunen attraktiv og som tek vare på helsa til innbyggjarane i alle aldrar, sa han.

– Me tenkjer ofte at idrettshallane og tilboda er aller viktigast for borna, men me ser jo no at folk på over 90 år trenar på treningssentera og andre anlegg. Det er veldig viktig for oss, sa ordføraren.

Mange av dei eldre som held seg i form, bidreg i lokalsamfunnet og får livsglede av å bruka dei lokale tilboda, ifylgje Haug. Han meiner også at Jondal er heilt unik ved å ha alle tilboda i sentrum.

– Det gjer at aktivitet avlar aktivitet, og det bør gjera Jondal til kanskje den mest attraktive delen av kommunen vår, for det er så bra og så flott, sa Haug.

Ikkje uventa hausta utsegna både applaus og trommevirvel, men det var ikkje berre ordførarskryt, forsikra Haug. Han meiner det er sånn, og viste til både skulen og tilboda rundt. Han trur det må vera veldig attraktivt for barnefamiliar og for så vidt folk i alle aldrar å bu og leva eit godt liv i bygda.

– Det er her det skjer. Kom og sykla på spinningsyklane, og reis heim innimellom og lag masse ungar og slikt! sa Haug.

Viktig for folkehelsa

Totalprisen har nok bikka 1,8 millionar kroner, trur Toreid i idrettslaget. Verdien av dugnad er inkludert. Rundt 1,2 millionar er dekte inn med spelemidlar, kommunalt tilskot og pengegåver.

Det heile starta med eit innspel på årsmøtet i idrettslaget for fem år sidan, fortalde han til dei frammøtte. Sigrid Brattabø Handegard og Ida Sørheim meinte at styret måtte vera aktivt og prøva å få inn eit treningssenter i prosjektet med bygginga av den nye idrettshallen.

– Om du meiner du noko, får du stort sett i retur at «då får du fylgja opp og gjera noko med det», sa Handegard då ho fortalde litt om starten.

Og Handegard tok tak. Ei arbeidsgruppe vart laga til med henne sjølv, Sørheim, Vilde Handegard og Per-Christian Midtun. Etter kvart kom også Jarle Jensen inn. Hallen stod klar hausten 2020, og JondalGym opna i april 2021. I dag er senteret brukt av jondølingar og tilreisande mellom 16 og 90 år, og er ope 365 dagar i året.

– Det er kanskje noko av det viktigaste folkehelsetiltaket me har – det å driva med styrkjetrening og halda kroppen ved like, sa den tidlegare jondalsordføraren.

Handegard synest det er veldig kjekt at prosjektet har kome så langt. Ho er sikker på at dei som allereie bur i Jondal, vil trivast endå betre, og at fleire vil ha lyst til å koma å bu der og besøkja bygda, sa ho. Den engasjerte politikaren, som representerte både fylkeskommunen og Bremnes Seashore AS på opninga, meiner eit treningssenter er viktig for Jondal. Og ein ting er heilt klart, meiner ho – det er ingenting som kjem av seg sjølv.

Betre enn venta

Då det vart snakk om treningssenter, var også eit spinningrom med i tankane. Jarle Jensen fortel at arbeidsgruppa har vore «på» heile tida, både før og under bygginga. Det var mange møte og fram og tilbake, fortel Jensen, og det var vanskeleg å finna ei tenleg løysing. Men så kom prosjektleiar Anders Hjartnes med eit innspel. I andre etasje var det nemleg sett av eit rom til teknisk rom og lager. Der kunne det kanskje vera råd å få til noko, meinte han.

Jensen vart gira. Ei ny arbeidsgruppe vart danna for å jobba for JondalSpinn. I haust byrja ting å skje. Leiar Toreid fekk beskjed om at idrettsrådet skulle fordela kommunale anleggsmidlar, og ein søknad vart skriven.

– På møtet i oktober fekk me løyvt 465.000 kroner. Det var nok til at Jarle sa at «då går me i gang». Og ikkje lenge etterpå står dette fiks ferdig, sa Toreid.

Ifylgje Jensen har det vore mykje dugnad og ganske intensivt arbeid. Også profesjonelle har vore innom. Rommet, som er på kring 130 rutemeter, var berre eit råbygg då arbeidet byrja. No står rommet klart med 22 spinningsyklar og storskjerm. Ved sida av syklane er det bygt ein vegg med speglar, og på golvet er det god plass til å driva styrkjetrening, yoga, steptrening eller anna. I ei sofagruppe er det råd å slappa av mellom øktene.

Syklane og utstyret elles er berre «Rolls-Royce», ifylgje Jensen. Han skrytte også av leiar Toreid. Han er veldig framoverlent, meiner han.

– Eg håpa det skulle bli knallbra, så vart det nesten endå betre.

No er ei ny gruppe på plass som skal driva og organisera aktivitetane. Gruppa består av Karoline S. Nystøyl, Aaron Miille, Karoline Vethe Karlsen og Elisabet Hesvik. Sistnemnde skal leia gjengen. Dei opplyste at den fyrste timen ville gå av stabelen allereie måndag 13. mars med instruktør Linda Vestgård, og at dei såg fram til å koma i gang.

Gruppa håpar folk vil innom og bruka rommet også utanom fellestreningane som vert sette opp. På skjermen ligg ruter klare både med og utan instruktør. Rutene tek trimmarane med til alle delar av Noreg.