Treng tomt til firbeinte
Kvam Hundeklubb treng sårt ein eigen treningshall og har spurt Kvam herad om tomt.
Hundeklubben, som etter innbyggjartalet i Kvam skal vera den mest aktive i landet, ynskjer tak over hovudet. For tida er klubben «på legd» i eit lite drivhus i Tørvikbygd. Det skriv styreleiar Tone Søgaard i ein e-post til Kvam herad.
Ifylgje henne trengst sårt ein treningshall om klubben skal klara å halda aktiviteten oppe. Vona er at heradet kan hjelpa til med å finna eigna tomt.
Draumen er ei mest mogleg flat og opparbeidd tomt med plass til ein hall på 15*30 meter. Det må dessutan vera plass til å parkera 15–20 bilar, og under større arrangement det dobbelte.
Tilbakemeldinga frå rådmannen i desember var at heradet ser lyst på initiativet, men ikkje veit kvar det kan vera aktuelt å etablera treningsarenaen. Klubben bør difor studera kommunal grunn på kart på den kommunale heimesida for å finna aktuelle tomter.
