Treng pengar til grillhytte
Leiar for eit prosjekt for utbetring av friluftsområdet Tyrvefjøra i Ålvik, Liv Turid Lofthus, har søkt kraftfondet i Kvam herad om 100.000 kroner.
Ålvik og Ytre Ålvik grendeutval har vedteke, etter framlegg frå Ålvik pensjonistforening, å utbetra området slik at også eldre og rørslehemma kan nytta det og få tilgang til sjøen.
Det er danna ei prosjektgruppe med fire representantar: Lofthus og Terje Auganæs frå grendeutvalet, Paul Ringheim frå Ålvik pensjonistforeining og Frode Wollestad.
Det totale kostnadsoverslaget er førebels på 500.000 kroner. Ein har ikkje eit detaljert budsjett enno, fordi det manglar eit prisoverslag på betong og ein del grave- og lyftearbeid. Søkjaren reknar med om lag 350 timar med dugnadsarbeid.
Planen er mellom anna å rydda vekk kratt og skrot, reisa ei grillhytte, leggja ein vassleidning frå det nye toalettanlegget, reparera muren langs stranda og laga ein veg for rullestolbrukarar. Ein vil òg leggja ut kampesteinar med eit solid rekkverk og reparera den øydelagde piren som stikk ut frå stranda.
