– Treng meir pengar

I høve oppgradering og utbygging av Øystese skule vart det i vinter sett ned ei arbeidsgruppe for å vurdera bruk av dei ulike skulane i Øystese. I eit skriv 25. mars konkluderte arbeidsgruppa med at det beste alternativet er å gå vidare med rehabilitering av Øystese skule der han ligg i dag.

I budsjettet for 2022 vart det oppretta eit forprosjekt retta mot Øystese skule, og i april engasjerte Kvam herad Rambøll Norge AS si avdeling i Bergen til å setja i gang. Forprosjektet skal innehalda skisser og kostnadsestimat, skriv leiar for forvaltning, drift og vedlikehald i Kvam herad, Stein Rykkje, i bestillinga til Rambøll.

Då Øystese Grendautval stilte spørsmål til kva som skjer med skulen, kom det fram i svaret frå teknisk leiar Lars Ese Ur at planen er å ha ei skisse av framtidig skule og eit kostnadsoverslag klart til budsjettvedtaket i desember. Om prosjektet vert vedteke, og når det eventuelt skal realiserast, er eit politisk spørsmål, skriv han.

Oppstart av arbeidet føreset at områdeplanen for Øystese er ferdigstilt.

Finst moglegheiter

Rykkje tykkjer skissene ser bra ut, og vonar heradet vil tinga ein meir detaljert plan og ein sluttrapport. Men det kostar. Dei 199.000 kronene som vart løyvde til forprosjektet, er ikkje nok.

750.000 kroner vart løyvd til eit prosjekt i 2019 for å kartleggja eksisterande bygningsmasse og tekniske anlegg på skulen. Det skulle også kartleggjast miljøfarlege stoff i bygg som kunne verta råka av ombygginga, geotekniske forhold i areal ved skulen, og avklarast særlege satsingsområde og krav og behov frå skulen.

Ikkje alle pengane er brukte opp, ifylgje Rykkje. Om rådmannen godtek det, kan pengane som ikkje er brukte, no verta nytta til å ferdigstilla detaljerte skisser. Rådmannen har ferie, men teknisk sjef kan truleg ta avgjerda i veka som kjem, opplyser han.

– God plassering

Øystese skule manglar fleire spesialrom og er spreidd på tre forskjellige bygg. Rambøll meiner eit nytt samla skulebygg vil gje elevane ein god og fleksibel skule med varierte læringsformer, der både det faglege og det pedagogiske vert vareteke.

I ei skisse som vart send til Kvam herad før ferien, er det teikna inn eit nybygg med eit bruttoareal på rett over 2.000 rutemeter, pluss loft for tekniske rom. Nybygget er teikna inn nord på tomta, der ballbingen står i dag, og er på to plan. 1936-bygget skal eventuelt rivast for å laga større skuleplass.

Både foreldrearbeidsutvalet (FAU) og tilsette ved skulen har fått høve til å koma med innspel.

Rektor Tore Torsvik tenkjer plasseringa av bygget er god. Avstandane vert kortare. Han seier at det elles er viktig for FAU og dei tilsette at det er nok grupperom og at det kjem gode løysingar for garderobar. Det er også meldt inn ynske om amfi.

– Skulen har fellessamlingar, foreldremøte og liknande som me ikkje har gode lokale for slik det er i dag, seier han.

I eit brev til heradet i midten av juni la FAU ved Torgeir Kristian Børve fram tankar om å laga til eit folkebibliotek i samband med utbygginga, og gjerne i 1936-bygget.

Når det gjeld vidare bruk av 1936-bygget, er det ein del problemstillingar knytte til energibruk, reinhald og tekniske anlegg som krev store påkostnadar. Dessutan kjem krav om universell tilgang, noko som er komplisert og dyrt å få til, opplyser Rykkje.