– Treng me eit slikt panel?

Brukarpanelet som vart valt av heradsstyret 1. februar, er det tredje i rekkja sidan 2018.

Odd Valland Bovim (MDG) føreslo at panelet skal ha høve til å ta inntil to årlege «stikkprøvar» av maten ved å stilla opp på dei aktuelle institusjonane. Initiativet kom frå rådet for menneske med nedsett funksjonsevne (RMNF), der Bovim er politisk representant.

– Det kan gje eit meir realistisk og rett bilete av maten og sikra brukarane kvalitet endå betre, argumenterte Bovim.

– Heilt urimeleg

Helse- og omsorgssjef Terje Langeland påpeika at stikkprøvar på kort varsel kan skapa trøbbel med tanke på mengda mat. Maten må tingast på førehand for å sikra at det er nok mat til alle. Bovim meiner det kan løysast enkelt, ettersom det truleg er snakk om få og enkle stikkprøvar, og viste til at framlegget gjekk ut på å overlata til panelet å løysa dette på tenleg vis.

Oddvar Brakestad (H) rådde sterkt frå ei ordninga der panellemene skal få høve til å eta i same rom som dei eldre.

– Det ville vore heilt urimeleg, sa han.

Brakestad meiner meir organiserte panelvitjingar der lemene kan sjå korleis maten vert førebudd, er ei betre løysing. Han trur ikkje brukarpanelet kjem til å avdekkja skilnad i sjølve matkvaliteten.

– Kjøtkakene 1. februar er dei same som 2. februar, sa han.

Bjørgulv Hauger (Frp) meiner leiarar i administrasjonen jamleg bør kontrollera matkvaliteten på eiga hand når dei vitjar institusjonane. Han synest elles at stikkprøvar er ein god idé.

Ordførar Torgeir Næss (Ap) meiner stikkprøvane kan gjennomførast enkelt ved at panelet får mat levert heim, og at det kan opplevast uverdig om panellemene dukkar opp på institusjonar. Bovim meiner ikkje det styrkjer verdigheita til brukarane om ein ikkje kan ta stikkprøvar, men tvert om sikrar ein ekstra innsats for å kontrollera kvaliteten.

Enden på visa var at berre fem av seks i Frp støtta stikkprøveframlegget. Marta Bergesen Gravdal (KrF) føreslo at panelet kan testa ikkje berre middagar, men også andre måltid. Ho fekk støtte av tre i Ap, så framlegget fall.

– Trur det ikkje

Gjermund Stuve (Sp) undrar om panelet trengst. Han påpeika at maten vert kjøpt av ein proff aktør med krav og normer. Dei tilsette på institusjonane burde kunna gje dei naudsynte tilbakemeldingane, sa han.

Hans røynsle er at ikkje alle eldre likar alt, og at presentasjon og servering har mykje å seia.

– Eg trur i utgangspunktet ikkje på at me får dårleg kvalitet, sa Stuve.

Langeland tok til orde for at panelet bør vitja både institusjonar som har matvertar og som ikkje har slike, for å kunna samanlikna. Stuve er samd i at det er viktig.

– Ingen kontroll

Bjørgulv Hauger (Frp) viste til at matleverandøren var på plass og førebudde maten då det fyrste panelet prøvesmaka mat i 2018. Det sjokkerte han.

– Når det er så organisert at leverandøren er på plass, er det ingen kontroll. Då kunne ein berre ha avlyst, sa han.

Rådmann Anita Hesthamar opplyste at grunnen til at leverandøren var med, var at han kunne fortelja om seg sjølv. Ho trur ikkje det har skjedd fleire gonger.

H har etterlyst dokumentasjon av tidlegare prøvesmaking, som grunnlag for å studera utviklinga. Langeland forsikra om at det nye panelet vil ta hand om historikken.

Vedtaka om dei to tidlegare panela slo fast at heradsstyret skulle få jamlege løypemeldingar. Etter det HF veit, har ikkje det vore gjort. Kravet er med også i det nye vedtaket. RMNF føreslo å krevja løypemelding kvart halvår, men framlegget vart korkje nemnt eller vedteke i heradsstyret.

Arne Sandven (KrF), Jostein Moldsvor (KrF) og Linda Jondahl Haugland (Ap) representerer heradsstyret i det nye panelet. Marit Heidi Seim representerer RMNF. Ifylgje Langeland, som vert leiar og får med seg fleire frå administrasjonen, skal panelet møtast for å drøfta framgangsmåtar.