Treng lokale til kulturskule
Kulturskulen i Norheimsund kan ikkje lenger halda til i den tidlegare ungdomsskulen.
Bygget skal rivast, og det skal byggjast ein ny vidaregåande skule.
Heradet ynskjer seg eit bygg med om lag 200 rutemeter areal innanfor ein radius på 300 meter frå haldeplassen.
Lokala skal nyttast til dans, visuelle kunstfag, drama, øvingsrom, lager, kontor, kjøkenkrok, pauserom og toalett. Dei må vera universelt utforma.
Må ut
Kulturskulen må ut på eitt eller anna tidspunkt uansett, seier leiar for samfunn, næring og kultur i Kvam herad, Jon Nedkvitne.
Ein veit ikkje kva som skal skje med kulturskulen. Men uansett må han ut for ein kortare eller lengre periode, før ein eventuelt flyttar inn i den vidaregåande skulen eller ein annan stad, opplyser Nedkvitne.
Fredag hadde ingen svara på annonsen om nye lokale.
Husleiga vil Nedkvitne koma attende til når han får sjå kva folk har å tilby. Ein vil trenga rom som er tilrettelagde for eit godt miljø i skulen, både for aktivitetar og administrasjon.
Di fleire aktivitetar ein kan få plass til på éin plass, di betre er det, for å skapa god stemning og eit godt «kulturhus», opplyser Nedkvitne.
I fyrste omgang er behovet mellombels. Så kjem det an på kva den vidaregåande skulen skal romma.
– Det ligg i korta at me skal arbeida for å få kulturskulen inn der, seier Nedkvitne.
Vel 300
I alt er det vel 300 kulturskuleelevar i heradet. På dei andre stadene nyttar ein skulane til undervising.
Nedkvitne seier kulturskulen betyr veldig mykje for ei bygd. Både lærarar og elevar skal ha gode læringsarenaer.
Kulturskulen vert finansiert primært med elevbetaling. Elevane leiger òg instrument frå skulen. Skulen søkjer dessutan om eksterne prosjektmidlar.
Fristen for å tilby kulturskulelokale er 4. september.
