– Treng lager i sjø

Statsforvaltaren klaga nyleg på det lokalpolitiske dispensasjonsvedtaket som gjev oppdrettaren høve til å lagra utstyret på den tidlegare akvakulturlokaliteten Horggjona.

No har Lingalaks sendt kommentarar til klagen, før han vert vurdert av planutvalet.

Les også:

– Me har lager for reservedelar og anna mindre utstyr på land, men må som sjøaktør også ha lagerfasilitetar i sjø som er lovleg plasserte. Det klare behovet for lagerareal på sjø er knytt til merdar og anna større, flytande utstyr som mellombels er ute av drift. Me har ikkje tilgang på høveleg landareal for å lagra slikt utstyr i dag, og prosessen er tidkrevjande, medan behovet er til stades både no og frametter, heiter det i innspelet.

Selskapet understrekar at produksjonen på lokaliteten vart flytta til Saltkjelen på grunn av produksjonstekniske tilhøve, ikkje arealkonfliktar. Andre lokalitetar som er ledige, er ikkje eigna, vert det opplyst.

– Arealet bør liggja ein stad som passar inn med vår basestruktur, då det er behov for dagleg oppsyn og overvaking for å hindra havari eller liknande. Vår hovudbase for sjødrifta er på Linga, og me har eit anlegg sør og eit nord for Horggjona, som gjer at lagerareal på Horggjona vert sentralt logistikkmessig, skriv Lingalaks.

Selskapet framhevar at det ikkje er kartfesta verdiar eller registrert bruk ved Horggjona, at området ikkje har press, at tiltaket kan gjerast om. Til innvendingane frå Kystverket påpeikar Lingalaks at den same aktøren tidlegare har godkjent oppdrettsverksemd ved Horggjona.

– Me har ikkje erfaring med farlege situasjonar knytt til ferdsle på sjø eller nærleik til skipsleia i den tida me dreiv på lokaliteten. Ein kan også nemna at det ligg aktive anlegg tettare på skipsleia enn Horggjona, som til dømes Ljonesbjørgane, og desse har heller ikkje medført problem. Sjøtrafikk til Horggjona vil i hovudsak vera avgrensa til dagleg oppsyn og overvaking, gjennomført av arbeidsbåtar som uansett køyrer forbi Horggjona frå Linga til Saltkjelen, skriv oppdrettaren.

Selskapet meiner at korkje Statsforvaltaren eller heradet stettar kravet til grunngjeving i forvaltingslova.