Treng fleire studentar

I haust vert det sett opp kurs i teori til fagbrev i barne- og ungdomsarbeidarfaget, teori til fagbrev i helsearbeidarfaget, kveldskurs i sirkulærøkonomi og kurs i rettleiing av lærlingar.

– I tillegg kjem det mykje spanande innan digitalisering og kunstig intelligens utover hausten og vinteren.

Det seier siviløkonom og forretningsutviklar Mina Evjen i Hardanger og Voss Næringshage (HVN).

Dei tre aktørane er HVN, Næringshagen i Ullensvang og Kvinnherad Næringsservice. Dei samarbeider mellom anna med fagskulen AOF Vestland og Agder, Digital Norway og Universitetet i Bergen.

Dei to kursa for fagbrev har fått utsett oppstarten til 18. oktober. Søknadsfristen er løpande fram til oppstart.

Har fått klarsignal

I skrivande stund er det ni påmelde på barne- og ungdomsarbeidarkurset, og Evjen har fått melding om at det vil starta opp. Kvar undervisinga vil skje, kjem litt an på kvar dei påmelde bur, men det vert uansett høve til å fylgja undervisinga digitalt.

På helsefag er det berre to påmelde.

– Det stressar meg litt om dagen, vedgår Evjen.

– Me jobbar iherdig for å få på plass dei siste detaljane for studiesenteret og nettsida, og marknadsfører alle kursa.

Målgruppa for dei to teorikursa er dei som arbeider i barnehage og skule eller i helseinstitusjonar, men ikkje har fagbrev i dag. Dei har kanskje allereie nok praksis til å kunna ta fagbrev.

Treng lokale

Næringshagen har ein intensjonsavtale med Kvam herad om leige av lokale. Ein ser på ulike løysingar. Valet avheng av kor mange påmelde det vert.

Studiesenteret skal dekkja heile hardanger- og vossregionen. Det vert eit regionalt senter med studentstover i Kvinnherad, Ullensvang, Eidfjord, Ulvik, Voss og Kvam.

– Det er ganske ambisiøst?

– Ja, det er det, men per i dag er stovene allereie oppretta i Eidfjord og Ullensvang. Berre få detaljar står att i dei andre kommunane. Me håpar at me skal få det til å fungera godt og at det er grunnlag for bruk av stovene, seier Evjen.

Studiesenteret skal vera ein stad der studentar kan samlast både for å lesa og fylgja nettundervising, åleine, eller viss det er fleire som tek same kurs.

Næringshagen får stønad frå Direktoratet for høgare utdanning og kompetanse til prosjektet. Vestland fylkeskommune og dei seks nemnde kommunane bidreg òg med pengar, opplyser Evjen.

– Forhåpentleg vil me klara å skaffa næringslivet den kompetansen det treng, seier ho.

Kartlegg behov

Næringshagane har tidlegare prøvd å få til ei barnehagelærarutdanning. Ein søkte direktoratet om pengar, i samarbeid med Høgskulen på Vestlandet, om å få setja opp ei desentralisert utdanning, men det lukkast ikkje. Det er aktuelt å søkja på nytt til våren, viss behovet framleis er der i kommunane. I haust og i vinter skal ein arbeida med å kartleggja behovet. Det er også andre samarbeid på trappene.

– Me vil vera eit talerøyr på vegner av næringslivet for å sikra at regionen har tilgang på den kompetansen han treng, både på kort og lang sikt, skriv HVN på heimesida.

Nettsida for prosjektet er distriktsutdanning.no.