– Treng betre skilting
Ein heilskapleg skiltplan er turvande for å gje Norheimsund eit betre og meir oversiktleg trafikkbilete.
Det skriv Norheimsund Næringslag i eit innspel til den kommunale trafikksikringsplanen.
Spesielt skilting til parkeringsareal vil vera viktig. Ein bør dessutan sjå på skiltinga ved nedkøyringa til kaien og ved haldeplassen, då det relativt ofte vert sett bilar i feil køyreretning der, skriv laget. Laget ynskjer seg i tillegg skilt på vegane inn mot sentrum som syner at ein nærmar seg eit sentrumsområde.
Næringslaget viser til auke i gjennomgangstrafikken i Norheimsund som fylgje av auke i trafikken på jondalsferja. Dette påverkar trafikkbiletet i sentrum vesentleg, og næringslaget ynskjer at Kvam herad vurderer redusert fartsgrense gjennom sentrum, heva fotgjengarfelt på eit punkt mellom avkøyrsla til Hardanger Brygge og Hardanger fartøyvernsenter, kutting av tre som har vakse seg store langs hovudgata og parkeringsplass for turistbussar i turistsesongen.
