Trekte seg frå hurtigbåt-prosjekt

Verksemdene ESNA, LMG Marin, SES-X og Transportutvikling har gått vidare frå fase 2 i tevlinga om å levera miljøvennlege hurtigbåtar til fylkeskommunane Vestland, Trøndelag, Nordland, Troms og Finnmark. Det skriv Vestland fylkeskommune på Internett.

Fjellstrand AS var med i fase 1 av prosjektet, men sals- og utviklingssjef Edmund Tolo fortel at verftet valde å trekkja seg før fase 2 byrja.

– Prosjektet var lagt opp slik at fylkeskommunane skulle eiga det me utvikla. I Fjellstrand ønskjer me å eiga det me utviklar. I løpet av prosessen vart det meir og meir tydeleg at dette er eit oppdrag som passar for konsulentverksemder og ikkje for verft. Fjellstrand vil gjerne vera med på å byggja båtane når dei er ferdig utvikla, seier han.