Trekte motsegn på Torsnes

Noregs vassdrags- og energidirektorat har nemleg trekt motsegna til reguleringsplanen for Plommevika, som legg til rette for anlegget til Hardanger Fishfarm AS.

Bakgrunnen er eit revidert planframlegg og ein førespurnad frå kommunen om å trekkja motsegna. Det var NVE altså villig til å gjera, så sant det er den vurderte planversjonen som vert vedteken.

Les også:

Eit sentralt poeng i motsegna var at planframlegget opplyste at oppdrettsverksemda kunne falla inn under ei forskrift om store ulukker, noko som medfører at verksemda må plasserast utanfor skredutsette område. I eit notat frå Norconsult vert det argumentert for det motsette. Det slår beina under det meste av grunnlaget for motsegna, slår NVE no fast.

NVE meinte også at planframlegget ikkje sikra godt nok at utfylling i sjøen kunne skje på ein trygg måte. Direktoratet seier seg no nøgd med krava som er stilte til tiltaka og med nye føresegner som stiller krav om granskingar av grunnen og geoteknisk detaljprosjektering. Dermed er grunnlaget også for denne delen av motsegna vekke.

Framleis har Statsforvaltaren motsegn til planframlegget, mellom anna på grunn av verknaden av det store steindeponiet i sjøen for naturmangfaldet og landskapet.

Dagleg leiar Henning Grønhaug i Hardanger Fishfarm bad i desember om eit møte med NVE om motsegna. Direktoratet svara at det ynskjer å ha dialog direkte med kommunen og ikkje med tiltakshavaren.