Trekte ikkje motsegna
Meir tilpassingar må gjerast i planen for «kulturhus» ved Akkjerhaugen.
Ullensvang kommune var 9. februar i dialogmøte med Statsforvaltaren om planframlegget, som sistnemnde har fremja motsegn til. Han ville i møtet ikkje trekkja motsegna, sjølv om planleggjar Ard Arealplan har justert det i vinter.
Kommunen rår, basert på innspel frå Statsforvaltaren, konsulentselskapet til å gjera fleire endringar i planframlegget og greia ut strandsoneproblematikken grundigare. Mellom anna meiner kommunen at ein ikkje bør opna for hotellfunksjonar i det nye kulturbygget, for å unngå privatisering, å konkretisera utforming og byggjehøgder betre, og å redusera høgda på bygget. Avgrensinga av bygget må visast på plankartet, og god tilgang for ålmenta må sikrast kring det, meiner kommunen.
Vidare må føresegnene sikra at det mykje omtala badehuset knytt til Hardanger House vert offentleg tilgjengeleg. Ein privat avtale er ikkje tilstrekkeleg, meiner Statsforvaltaren. Kommunen føreslår dessutan at føresegnene sikrar at den eksisterande verkstaden ved sjøen der kultursenteret skal liggja, vert rive.
Statsforvaltaren meiner bygget ikkje bør raga høgare enn 16 meter, like høgt som ein kolle. Akkjerhaugen ligg på kote 22. I planutkastet var byggjehøgda 19,5 meter.
Reguleringsplanen er i strid med både kommuneplanen og den gjeldande reguleringsplanen. Hardanger House, som er ein del av planområdet, vart ført opp på dispensasjon frå Jondal kommune.
